Gulrótarkaka; góð báðum megin

Jæja, ætli ég verði ekki að skrifa eins og einn lítinn pistil svo að hann bróðir minn fari ekki að reka mig héðan. Ég er því miður ekki enn orðin þessi skipulagða týpa sem mig langar svo innilega að vera, en batnandi mönnum er best að lifa og tileinka ég þennan pistil minni bestu vinkonu; Agnesi Ýr Guðmundsdóttur.

Í kvöld ætla ég að deila með ykkur þeirri allra bestu gulrótarköku sem ég hef fengið í lífinu. Ég smakkaði hana í fyrsta skipti síðastliðið haust einmitt hjá Agnesi (Gumma Salla og Fanneyjar) og hún var einfaldlega himnesk, eins og allt sem Agnes bakar og eldar. Ég var svo sniðug að fá hjá henni uppskriftina og gefa svo mömmu hana – þannig að nú er þetta orðin ein af ómissandi uppskriftum heimilisins og skellti mamma einmitt í eina köku í síðustu viku og ætla ég nú að leyfa ykkur að njóta með.

Þeytið saman egg, sykur, púðursykur og vanilludropa í hrærivél þar til blandan verður létt og ljós. Rífið gulrætur og blandið saman við hræruna. Sigtið saman hveiti, lyftiduft, salt, kanil og múskat og látið út í ásamt matarolíu og hnetum. Mamma bakaði þetta í einni stórri skúffu, en uppskriftin segir í tveimur smurðum og hveitistráðum formum, í 175°C heitum ofni í 30 mínútur.

Þetta er svo allt hrært saman í hrærivél þar til kremið er mjúkt en frekar stíft og smurt á kalda kökuna. Kakan er skreytt með rifnum gulrótum dýft augnablik í sítrónusafa, valhnetum eða hvorutveggja. Ég vil samt benda á að þessi kaka er eins og Homeblest; hún er nefnilega góð báðum megin! Kakan er alltsvo alls ekki verri þegar það er ekki krem á henni en í þetta skiptið notaði hún móðir mín sem sagt tilbúið krem, henti kökuskrauti fyrir og reif smá sítrónubörk yfir; namm!

Ég reyni svo að standa mig betur og skrifa oftar því ég er sko aldeilis með nóg af hugmyndum fyrir sumarið og bíða m.a. skötuselur, lax, hamborgarar og pylsur í Heimabakarísbrauðum, Rollo ostakaka og margt, margt fleira þess að ég skrifi um þau. Svo fylgist með á 640.is :)

Olga Hrund