Bakaður þorskur með sítrónu, basiliku og Hveravallartómötum

Ég er nýkomin heim úr mikilli matarveisluferð til Kaupmannahafnar þar sem við systur heimsóttum okkar ástkæru bróðurdóttur. Það var aldeilis ekki útséð um það í byrjun vikunnar síðustu hvort að við myndum komast til hennar sökum veðurofsa á landinu.

Ég held að það sé skemmst frá því að segja við vorum heppnar, mjög heppnar, og það var ekki laust við að við þökkuðum einhverjum æðri máttarvöldum þegar við sóluðum okkur um í Köben á miðvikudeginum eftir að hafa farið Reykjanessbrautina í blindbyl um nóttina og varla séð út úr augunum þegar við hlupum inn í Leifsstöð.

Það var ansi ljúft að skreppa í nokkra daga í smá sól og sælu en best auðvitað að hitta frænkuna og eiga með henni góðar stundir ásamt systur. Kaupmannahöfn er yndisleg borg með fullt af skemmtilegum og flottum kaffihúsum, börum, veitingastöðum og öðrum skemmtilegheitum. Hér koma nokkrar myndir úr ferðinni - þið afsakið það samt vonandi að ég var ekki með góða myndavél með mér:

Nyhavn á sunnudagseftirmiðdegi

Fullt af veitingastöðum, börum og kaffihúsum þarna

Blóm til sölu út um allt og vorfílingur í lofti

Malbeck Vinoteria - frábær staður

Við systur segjum aldrei nei við smá tapas

Ítalski veitingastaðurinn mother - mæli svo sannarlega með honum

Þar sem það var svona eilítið sukkerí þessa daga í Köben þá held ég að það sá ágætis hugmynd hjá mér að birta eftirfarandi uppskrift sem ég sá á www.vinotek.is af þessum mjög svo girnilega fiskrétti.

Bakaður þorskur með sítrónu, basiliku og Hveravallartómötum

• 1 vænt flak af þorski
• 500 grömm kirsuberjatómatar (frá Hveravöllum að sjálfsögðu)
• 3 hvítlauksrif
• 3 sítrónur
• 2 lúkur basilika
• 3 msk olífuolía
• 1 msk hunang
• salt
• pipar

Stillið ofninn á 250 gráður. Skerið tómatana í tvennt. Skerið hvítlaukinn í litla bita. Rífið börkinn utan af sítrónunum. Takið blöðin af basilikkunni. Blandið saman hvítlauknum, sítrónuberkinum, ólífuolíunni, hunanginu, saltinu og piparnum. Blandið síðan tómötunum og basilikkunni saman við.  Setjið í eldfast mót.

Saltið og piprið fiskinn vel og leggið ofan á tómatana. Skerið síðan nokkrar þunnar sneiðar af  sítrónu (notið sítrónuna sem börkurinn var rifinn af) og leggið ofan á fiskinn.

Bakist í ofni í 15 mínútur.  Borið fram með t.d. kúskús eða hrísgrjónum.

Verði ykkur að góðu!