Góð grænmetisbaka

06. sep

Góð grænmetisbaka
Sötrað & snætt í sælunni - Olga Hrund - Lestrar 775 - Athugasemdir (0)

Þá er ég komin aftur úr óvæntu sumarfríi frá pistlastörfunum hér á 640.is, það var nú ekki ætlunin að taka sumarfrí en annir við leik og störf tóku af mér öll völd svo að lítið varð úr matarskriftum. En nú er ég komin aftur og vonandi get ég skrifað hitt og þetta um allskonar mat og skemmtilegheit í hverri viku í vetur.
Ég vona að þið hafið átt gleðilegt sumar og náð að borða mikið og gott, það gerði ég svo sannarlega út um allar trissur en ég fór meðal annars í Kelduhverfið, til Noregs og Spánar, til Akureyrar og Reykjavíkur, í Mývatnssveitina auðvitað og síðast en alls ekki síst í Stykkishólminn. Svo má auðvitað ekki gleyma elsku Húsavík, en þar var svo sannarlega líka borðað. Ég hlakka því til að deila með ykkur allskyns spennandi matarsögum á komandi mánuðum.

Þar sem það er vaninn að ætla sér að byrja í holllustunni svona um þessar mundir þá ætla ég að byrja á mjög girnilegri uppskrift að grænmetisböku sem að ég fann einhversstaðar, man ekki hvar, en hér kemur hún.

Grænmetisbaka

Botn

1 dl haframjöl

2 dl heilhveiti

2 msk ólífuolía

1 dl ab-mjólk

2 msk kalt vatn

Aðferð: Blandið saman þurrefnum, olíu og ab-mjólk, síðast vatninu. Hrærið vel og hnoðið. Geymið deigið í ísskáp í a.m.k. 30-40 mínútur. Fletjið deigið út í mót, smyrjið með smá ólífuolíu og raðið grænmetinu á. Hellið sósu yfir og bakið í 30 mínútur við 200°C.

Grænmeti

1-2 gulrætur, sneiddar í þunnar sneiðar

½ kúrbítur (zucchini), skorinn í bita

5-7 sveppir, niðursneiddir

½ eggaldin, skorið í þunnar sneiðar

½ blaðlaukur, sneiddur í þunnar sneiðar

Það má auðvitað setja hvaða grænmeti sem er og ég myndi taka út kúrbítinn og eggaldinið og hafa t.d. rauða papriku, tómata, og spergilkál í staðinn. Steikið grænmetið og kryddið.

Sósa:

2 egg

2 ½ dl mjólk eða ab-mjólk

4 dl magur ostur (11%) – 2 dl í sósuna og 2 dl yfir bökuna

Aðferð:Þeytið saman egg og mjólk. Rífið ostinn og blandið 2 dl saman við. Hellið yfirr grænmetið. Dreifið afganginum af ostinum yfir bökuna og setjið inn í ofn. Gott er að bera fram með sósu úr ab-mjólk. Blandið saman 2 dl ab-mjólk, salti, pipar, hvítlauk (pressuðum) og paprikudufti. Berið fram með soðnum bygggrjónum eða hýðishrísgrjónum og fersku salati. Verði ykkur að góðu!