Bleikja og byggottStra & sntt slunni - Olga Hrund - Lestrar 537 - Athugasemdir (0)
Við á Fosshótel Húsavík ætlum að starta ferðamannasumrinu okkar með
því að bjóða ykkur öllum að koma til okkar í morgunverð núna á sunnudaginn næsta, 8. maí, milli klukkan átta og
ellefu. Einnig mæli ég með að þið takið allan daginn frá því það er svo sannarlega spennandi sunnudagur framundan hér á
elsku Húsavíkinni okkar. Nánari upplýsingar verða í Skránni á fimmtudaginn næsta.
En hér kemur uppskriftin sem að þessu sinni, sem og svo oft áður, er tekin upp úr
því snilldarblaði Gestgjafanum:
BYGGOTTO MEÐ STEIKTRI BLEIKJU - Gestgjafinn, 3. tbl. 2011, bls.
23
fyrir fjóra
13-14 dl vatn og fiski – eða grænmetiskraftur
50 g smjör
2-3 skalotlaukar, saxaðir
2 hvítlauksgeirar, saxaðir
3 ½ dl bygg
1 dl hvítvín, má gjarnan nota matarhvítvín eða sleppa og nota vatn og sítrónusafa blandað saman
1 msk sítrónubörkur, rifinn
2 dl rifinn parmesanostur, u.þ.b. 100 g
3-4 bleikjuflök
2 msk olía
Salt og pipar
2 steinseljurætur, saxaðar í teninga
Setjið vatn og fiskikraft í pott og sjóðið saman. Bræðið smjör í potti og steikið lauk og hvítlauk þar til hann fer að verða glær. Bætið byggi út í og steikið í 1-2 mín. Eða þar til grjónin eru búin að draga svolitla fitu í sig. Hellið hvítvíni út í og sjóðið í 1-2 mín. Eða þar til vökvinn er að mestu gufaður upp. Bætið fiskisoðinu út í smátt og smátt, í einni ausu í einu, og látið byggið draga í sig soðið smám saman. Haldið góðum hita á þessu allan tímann en gætið þess að hafa hann samt ekki of háan. Það tekur u.þ.b. 20 mín. Að elda byggið, hrærið í öðru hvoru. Útbúið sósuna á meðan. Steikið steinseljurætur í svolítilli olíu og geymið. Bætið sítrónuberki og parmesanosti út í byggið þegar það er soðið og haldið því heitu. Beinhreinsið bleikju með töng eða plokkara og skerið flökin í 2-3 cm bita. Hitið olíu á pönnu og steikið bleikjuna með roðið niður fyrst. Steikið hana nær allan tímann á roðhliðinni þá verður roðið stökkt, kryddið með salti og pipar. Snúið bleikjunni við og steikið í smástund á hinni hliðinni. Já eða bara grillið úti á grilli ef ykkur sýnist svo. Setjið byggotto á diska, dreifið sósunni og steinseljurótarbitum í kring og raðið bleikjunni ofan á. Það er gott að hafa sítrónusneið með.
Sósa
2 eggjarauður
1 msk hvítvínsedik
Svolítið salt
100 g smjör, brætt
Hnefafylli klettakál, maukað í matvinnsluvél
Sítrónusafi
Hrærið eggjarauður og vínedik saman yfir vatnsbaði við vægan hita þar til blandan fer að þykkna. Bætið smjöri út í smám saman, gætið þess að hitinn sé ekki of mikill. Bætið klettakáli í sósuna og smakkið til með sítrónusafa.
Verði ykkur að góðu!