Umfjöllun: Völsungar slegnir í rot

Vladica Djordjevic, okkar nýjasti maður!

Völsungar mættu Leikni Reykjavík í 3.umferð 1.deildar karla á Húsavíkurvelli. Það voru bölvuð ský fyrir sólu og smá úði er leikurinn hófst.

Byrjunarlið Völsungs: Dejan Pesic, Sveinbjörn Már Steingrímsson, Petér Odrobéna, Marko Blagojevic, Sindri Ingólfsson(Sigvaldi Þór Einarsson'46). Halldór Fannar Júlíusson(Arnþór Hermannsson'46). Halldór Orri Hjaltason, Guðmundur Óli Steingrímsson(Pétur Ásbjörn Sæmundsson'66). Ásgeir Sigurgeirsson, Hrannar Björn Steingrímsson(f), Vladica Djordjevic.

Gul spjöld: Dejan Pesic '30. 

Leiknismenn hófu leikinn grimmari og uppskáru horn og mark á 5.mínútu. Hornspyrnan sveif yfir á fjærstöng þar sem Brynjar Hlöðversson var einn og óvaldaður og setti boltann létt og örugglega í markið af stuttu færi. 0-1.

Völsungar bitu þó frá sér og áttu nokkrar ágætis sóknir. Sérstaklega var ein álitleg þar sem margir tóku þátt í spilinu sem endaði með að Halldór Orri og Hrannar tóku þríhyrning, Halldór fékk boltann aftur og þrumaði að marki en markvörðurinn varði vel og hreinsað var í horn. Hrannar Björn átti einnig lúmska aukaspyrnu sem var varinn í horn alveg út við stöng.

Völsungar voru töluvert meira með boltann heldur en í öðrum leikjum sumarins hingað til og litu mjög vel út. Það var því afar dapurt þegar jákvæðnin hvarf við andartaks einbeitingarskort en Sveinbjörn Már tók þá, að er virtist, hættulitla fyrirgjöf á kassann og ætlaði að senda til baka á Dejan en sendingin arfaslök og framherji þeirra komst inn í hana rétt á undan Dejan sem tók hann niður í kjölfarið og vítaspyrna dæmd. Hilmar Árni Halldórsson steig á punktinn og átti gríðar örugga spyrnu í vinstra hornið. 0-2.

Við það var sem allur vindur og bjartsýni væri úr Völsungum. Staðan í hálfleik var 0-2.

Sama andleysið og baráttuleysið var við lýði í seinni hálfleik og það var ekki fyrr en seint í honum sem við sýndum lífsmark. Þá átti Hrannar gott skot sem var varið og Vladica Djordjevic skoraði rangstæðumark. 

Rétt áður höfðu Leiknismenn komist í 0-3 en þá kom langur bolti inn fyrir vörnina þar sem að Ólafur Hrannar Kristjánsson, sóknarmaður Breiðhyltinga, tók boltann á kassann og kláraði vel í stöngina og inn. Ólafur var kolrangstæður þótti okkur og ætla ég hér með að fullyrða það!

Við vorum ekki öflugir í langan tíma í dag. Það virtist sem að líf væir í okkur á milli tveggja fyrstu markanna en eftir annað markið vorum við heillum horfnir. Halldór Orri Hjaltason var valinn maður leiksins en hann þótti manna skárstur. Ásgeir sýndi líka mikla baráttu en lítið sást til hans í seinni hálfleik. 

Nú þurfa strákarnir í alvarlega naflaskoðun. Stundum er í lagi að tapa. En það má þó gera það með sæmd. Menn þurfa að sýna karakter og berjast saman sem hópur, gefa allt fyrir liðið og reyna að hala inn stig. Við fáum spennandi bikarleik í vikunni gegn Pepsi-deildar Fylki og það er vonandi að strákarnir rífi sig upp fyrir þann leik. Þrátt fyrir slæma byrjun eru nógu margir leikir eftir til þess að rétta okkar hlut.