Umfjöllun: Víkingssigur á Húsavík

Ný búningsaðstaða var vígð í dag!

Völsungar tóku á móti Víkingum úr Reykjavík á Húsavíkurvelli fyrr í kvöld. Óhætt er að segja að mikið hafi gengið á herbúðum okkar Völsunga síðastliðna viku en vel var mætt í brekkuna í kvöld til þesss að styðja strákana okkar. Aðstæður til knattspyrnuiðkunar voru dásamlegar, blautt gras og logn í dásemdarbæjarstæðinu Húsavík.

Byrjunarlið Völsungs: Sveinbjörn Ingi Grímsson, Sveinbjörn Már Steingrímsson, Gunnar Sigurður Jósteinsson, Pétur Ásbjörn Sæmundsson, Sigvaldi Þór Einarsson, Péter Odrobéna(Ármann Örn Gunnlaugsson'76), Halldór Fannar Júlíusson, Guðmundur Óli Steingrímsson, Halldór Orri Hjaltason(Eyþór Traustason'85), Ásgeir Sigurgeirsson(Bjarki Freyr Lúðvíksson'90), Hrannar Björn Steingrímsson (f).

Gul spjöld: Halldór Fannar Júlíusson '90

Rauð spjöld: Sigvaldi Þór Einarsson '33, Guðmundur Óli Steingrímsson '65

Sjáanlegt var að skrekkur var í Völsungum enda liðið töluvert breytt frá síðasta leik. Þó voru menn efnilegir fram á við og Ásgeir skallaði framhjá varnarmanni og stakk sér inn undir hann og var tekinn niður sloppinn í gegn. Gult spjald á varnarmanninn. Hrannar tók aukaspyrnuna frá vítateigshorninu en boltinn yfir markið.

Eftir aðra snarpa sókn átti Guðmundur Óli fyrirgjöf eftir korters leik sem Ingvar Kale greip vel inn í og kastaði fljótt í leik. Víkingar sóttu þrír á þrjá og góð stungusending inn á Sigurð Lárusson orsakaði það að hann þurfti bara eina snertingu á boltann til að setja hann framhjá Sveinbirni Inga í markinu. 0-1 staðan.

Baráttan hélt þó áfram en Völsungar urðu fyrir áfalli á 33.mínútu. Sigvaldi Þór kom þá á of mikilli ferð, en of seint, inn í mann með boltann og sólann á undan. Sigvaldi er gæðablóð svo við vitum öll að það var enginn illur vilji með þessu en hann tímasetti sig örlítið illa. Rautt spjald því á loft og við manni færri. Menn náðu þó að hrista sig örlítið saman við þetta og rifu sig aftur upp eftir doða eftir markið. Sveinbjörn Ingi varði einnig glæsilega rétt fyrir hálfleikinn en hálfleikstölur voru 0-1.

Grænklæddir mættu endurnærðir til leiks eftir hlé og ætluðu sér klárlega að berjast til síðasta blóðdropa. Á 53.mínútu lék Hrannar Björn upp vinstri kantinn og sótti inn á miðjuna áður en hann lagði boltann til hliðar á Halldór Orra sem lagði boltann fyrir sig og skaut innanfótarskoti af um 25 metra færi og smurði boltann út við nærstöngina. Virkilega snyrtilegt mark og gleðin í brekkunni ásamt fögnuði strákanna inni á vellinum var frábær. 1-1 og leikur á ný.

Menn voru þó mögulega aðeins of kampakátir með markið því aðeins tveimur mínútum síðar var staðan 1-2. Kæruleysisleg mistök í vörninni, Víkingar unnu boltann framarlega og Dofri Snorrason skoraði af stuttu færi úr markteig eftir fyrirgjöf frá hægri.

Menn héldu þó áfram og Ásgeir slapp inn fyrir á 62.mínútu og nikkaði boltanum framhjá Ingvari Kale í markinu, en nafni greip til þess ráðs að setja hendurnar fyrir Ásgeir og keyra hann niður. Alla daga ársins hjá öllum öðrum dómurum myndi maður sjá rautt spjald en nei, ekki hjá Jan Eric. Hann vissulega dæmdi víti enda Ingvar Kale að ræna Ásgeir augljósu marktækifæri en aðeins gult spjald á loft. Hrannar Björn steig á punktinn en víti hans fór í slánna og yfir. Hrannar veit að hann á að gera betur úr slíku færi og ég er milljón prósent viss um að næsta víti hans verður mark.

Það var ekki auðvelt að sjá að við værum manni færri en strákarnir börðust og börðust og vörðust alla jafna vel. Enn eitt reiðarslagið kom þó á 65.mínútu. Stungusending inn fyrir á Guðmund Óla sem er í kapphlaupi við Ingvar Kale um boltann. Guðmundur fer í tæklinguna en Ingvar nær höndum á boltann rétt á undan Guðmundi sem fer í hann. Jan Eric mætti á svæðið og var ófeiminn við að lyfta rauða spjaldinu á loft enda ekki um lærisvein Óla Þórðar að ræða. Frá mér séð virkaði þetta bara aldrei rautt spjald og ég stend við það og verð bara að éta það ofan í mig ef vídjóupptökur sýna annað. Þetta var ekki háskaleg tækling og Ingvar Kale velti sér um og greip um bakið og emjaði. Óverðskuldað rautt spjald að mínu mati en nóg um það, áfram hélt leikurinn. Skömmu síðar varð Sveinbjörn Már fyrir sólatæklingu en gult var liturinn á því spjaldi.

Enn sýndu strákarnir að árum yrði ekkert lagt í bát nærri strax og 9 á móti 11 (hér er rosalegt tækifæri fyrir að skrifa 12, ætla samt ekki að gera það!) veittu þeir Víkingsliðinu harða samkeppni og hlupu eins og óðir væru.

Hlutirnir gengu þó ekki upp og á 89.mínútu refsuðu Víkingar fyrir okkar hangs á bolta nærri vítateignum og komust í 1-3 og urðu það lokatölur. 

Það var gaman að fylgjast með liðinu í dag. Menn börðust eins og grenjandi ljón og voru oftar en ekki að reyna stutt og skemmtilegt spil til að færa sig upp völlinn. Mikið meiri ástríða heldur en í fyrri leikjum og einhvern veginn miklu meiri liðsheild inni á vellinum. Rauðu spjöldin gerðu okkur erfitt fyrir en menn lögðu bara á sig aukalega eftir því sem fækkaði á vellinum. Mér persónulega fannst mikils ósamræmis gæta í dómgæslunni hjá Jan Eric í dag en ég er þó ekki að kenna því um hvernig fór svo það sé á hreinu!

Ásgeir hljóp örugglega heilmaraþon og Sveinbjörn Már svipað. Ásgeir reyndi oftar en ekki skemmtilega hluti uppi á topp en vantaði að binda endahnútinn á lokasnertingar- eða sendingar. Hrannar og Halldór Orri viljugir og grimmir á miðjunni og Gunni Siggi með hörkuleik í vörninni. Halldór Fannar með mikið öryggi í þeim stöðum sem hann leysti og Sveinbjörn Ingi varði tvisvar gríðarlega vel þótt ég sæi á honum að hann væri manna svekktastur með þriðja markið. Hann rífur sig upp úr því og er skemmtilegur karakter og viðbót við okkar lið. Án þess að nafngreina alla áttu allir það þó sameiginlegt að þeir reyndu og gáfu allt sitt í verkefnið þó ekki hafi tekist ætlunarverkið, að sigra leikinn. Menn verða að halda dampi og halda svona áfram, þá kemur þetta.

Sveinbjörn Már var valinn maður leiksins en það var mikil samkeppni um þann titil í kvöld, sem er frábært. Nú verða menn að leggja allt í Haukaleikinn á þriðjudag. ÁFRAM VÖLSUNGUR!!

Tengdar greinar: Sveinbjörn Már: Börðumst allir vel og gengum ekki af velli með hangandi haus