Umfjöllun: Fjölnissigur á Húsavíkurvelli

Harpa í baráttunni!

Völsungsstúlkur tóku á móti Fjölni á Húsavíkurvelli í dag í sannkölluðum toppslag en fyrir leikinn voru Völsungar í 1.sæti en Fjölnisstúlkur í því 3. Fjölnir hafði þó spilað færri leiki en þær höfðu ekki enn fengið á sig mark í deildinni þegar leikar hófust. Biluð blíða og húllumhæ á vellinum

Byrjunarlið Völsungs: Anna Jónína Valgeirsdóttir, Anna Halldóra Ágústsdóttir, Elva Mary Baldursdóttir, Bojana Besic, Dagbjört Ingvarsdóttir(Ruth Ragnarsdóttir'55), Jóney Ósk Sigurjónsdóttir(Þórunn Birna Jónsdóttir'80), Berglind Ósk Kristjánsdóttir, Harpa Ásgeirsdóttir(f)(Ásrún Ósk Einarsdóttir'75), Laufey Elísa Hlynsdóttir, Helena Rós Þórólfsdóttir, Helga Björk Heiðarsdóttir(Sigrún Lilja Sigurgeirsdóttir '69).

Gul spjöld: Laufey Elísa Hlynsdóttir '90

Völsungsstúlkur byrjuðu leikinn á fullu gasi en þær héldu boltanum vel, voru að keyra upp hraðann og með flott spil án þess að skapa sér kannski afgerandi færi. Það var því eins og þruma úr heiðskíru lofti þegar við vorum með liðið ofarlega á vellinum, boltinn hrekkur út Fjölnisstúlka á langan bolta inn fyrir vörnina sem framherji þeirra hleypur uppi og á losaralegt skot í nærstöngina og inn. 0-1 og maður hreinlega trúði því ekki miðað við leikinn fram að þessu. 

Aðeins fimm mínútum síðar bættu gestirnir við marki. Komust í annað sinn í leiknum yfir miðju og fóru upp hægri kantinn. Þaðan var fyrirgjöf send upp í vindinn og lullaði hægt inn í teig. Varnarmönnum Völsungs gekk illa að reikna í svifið á boltanum og feiluðu á hann áður en að máttlaus hreinsun frá marki endaði við fætur framherja Fjölnis sem kláraði auðveldlega úr miðjum teig. 0-2 staðan en Völsungar búnar að vera með boltann allan tímann. Óþolandi ótrúlegt.

Helga Björk elti allt spil varnarlínu Fjölnis og í tvígang var hún aðeins skrefi frá því að stela boltanum af aftasta manni. Í eitt skipti var hún svo á undan markverðinum í boltann með því að renna sér á eftir honum en skot hennar rétt framhjá markinu. Rétt fyrir hálfleikinn átti Helena svo fínt skot en góður markvörður Fjölnis varði vel.

Seinni hálfleikurinn var ekki eins afgerandi mikið Völsungsstúlkna. Reynt var að blása lífi í sóknina með ferskum löppum en allt kom fyrir ekki. Ruth Ragnars kom sér tvisvar í fín færi í teignum en skot hennar hittu ekki markið. Eins átti Berglind Ósk tvö skot yfir úr ágætis skotfærum. Laufey Elísa klobbaði varnarmenn Fjölnis í sífellu í leiknum og eftir einn glæsilegan slíkan var hún komin í ágætis færi, helst til of þröngt þó og skot hennar var varið út í teiginn.

Leikurinn fjaraði svo út og 0-2 tap staðreynd. Það var ekki mikið um færi í leiknum en Fjölnisstúlkur nýttu sín mjög vel, það gerðum við ekki og það var munurinn á liðunum í dag. Stelpurnar okkar sýndu þó lengi vel framan af marga af sínum bestu spilköflum í sumar, sérstaklega ef tekið er mið af andstæðingnum. 

Elva Mary Baldursdóttir var valin Nivea-stúlka leiksins en hún var grjóthörð í öftustu línu. Hvernig hún fórnar sér fyrir hvern einasta bolta er svo ljónhart að ég er ekki frá því að ég myndi snúa við ef ég mætti henni í dimmu húsasundi. Hún var klassa ofar en aðrar í dag.

Næsti leikur er gegn Grindavík á útivelli. Grindavíkurliðið er sterkt og ljóst er að það verður hörkuleikur. Stelpurnar verða að halda þessari grimmd sem var framan af í dag og bætta aðeins í, þær eiga það inni. Við erum enn í toppbaráttunni í þessum riðli og höfum ekki mætt einhverjum andstæðing sem á að teljast betri en við, það er á hreinu. Hendum þessi tapi í reynslubankann og höldum áfram, ÁFRAM VÖLSUNGUR!!