Völsungur sló Þór út í Borgunarbikarnum

Sæþór skoraði sigurmarkið.

Völsungur gerði sér lítið fyrir og sló 1. deildarlið Þórs út í 2. umferð Borgunarbikarsins í kvöld.

Leikurinn fór fram á heimavelli Þórs í Þorpinu og komust heimamenn yfir á 21. mínútu leiksins með marki Reynis Más Sveinssonar.

Þannig stóðu leikar í hálfleik.

Það var síðan á 69. mínútu að Elvar Baldvinsson jafnaði og var það þvert gegn gangi leiksins eins og sagði í textalýsingu Fótbolta.net. Varnarmaðurinn Aron Kristófer Lárusson átti þá fína sendingu inn fyir vörn heimamanna sem Elvar nýtti vel.

Fimm mínútum fyrir lok venjulegs leiktíma átti Steinþór Már Auðunsson markvörður Völsunga langt útspark fram völlinn og Aron Birkir markvörður Þórs virtist vera með en hann og Ingi Freyr Vilhjálmsson lenda saman. Aron missir boltann og Sæþór Olgeirsson er aleinn í heiminum og hleypur með boltann í netið.

Ótrúlegt mark segir í textalýsingu Fótbolta.net, óvæntustu úrslit kvöldsins og Völsungar komnir áfram.

Skýrsla Fótbolta.net um leikninn

Hér má lesa leiksskýrslu af vef KSÍ

Elvar Baldvinsson jafnaði leikin gegn Þór í kvöld en hér er hann í snjóleiknum gegn Magna sl. föstudagskvöld.

Sæþór Olgeirsson skoraði sigurmark Völsungs í kvöld.