Völsungur kominn í undanúrslit B-deildar Lengjubikarsins

Bergur skoraði þriðja markið.

Völsungur er kominn í undanúrslit B-deildar Lengjubikars karla eftir sigur á Magna í miklum markaleik.

Leikurinn átti að fara fram á Húsavíkurvelli kl.12:00 í gær en vegna snjóa var hann færður inn í Bogann á Akureyri og fór fram kl. 19:00.

Það hafði engin áhrif á þá grænu sem komust í 4-0 áður en flautað var til leikhlés.

Sæþór Olgeirsson kom strákunum á bragðið með marki á 22. mín. leiksins. Aðalsteinn Jóhann Friðriksson og Bergur Jónmundsson skoruðu síðan á 26. og 27. mínútu og staðan orðin 3-0. Ingólfur Örn Kristjánsson skoraði síðan fjórða markið í blálok fyrri hálfleiks. 

Magnamenn minnkuði muninn fljótlega í seinni hálfleik með marki úr vítaspyrnu. Þeir bættu síðan tveimum mörkum við undir lok leiksins en þá voru Völsungar orðnir níu inn á vellinum en Grenvíkingar tíu. Sindri Ingólfsson og Sigvaldi Þór Einarsson fengu að líta sín seinni gulu spjöld og þar með rauð á 79. og 84 mín. leiksins.

Lokastaðan 4-3 og Völsungar efstir í riðli 2 með 11 stig.