Völsungsstelpurnar áfram í Borgunarbikarnum

Stelpurnar fagna öðru marki Kristu.

Völsungur vann 3-1 sigur á Einherja í Borgunarbikar kvenna í dag eftir að hafa lent undir í leiknum.

Leikið var á Húsavíkurvelli í hæglætissólarveðri og komust gestirnir yfir þegar Karen Ósk Svansdóttir skoraði á 22. mínútu leiksins.

Völsungar jöfnuðu í blálok fyrri hálfleiks þegar Lovísa Björk Sigmarsdóttir skoraði. Eftir gott spil upp völlinn fékk Hulda Ösp Ágústsdóttir boltann á fjærstöng og lagði hann út á Lovísu sem skoraði örugglega framhjá markverði gestanna.

Völsungar komu mun beittari til leiks í síðari hálfleik og skoraði Krista Eik Harðardóttir tvö mörk í honum. Það fyrra á 53. mínútu með góðu skoti frá vítateigslínu.  Það síðara kom á 77. mínútu þegar Dagbjört Ingvarsdóttir fyrirliði sendi háan bolta fram völlinn sem Lovísa náði að skalla áfram á Kristu sem skýtur á markið.  Markvörðurinn náði að verja skotið en hélt ekki boltanum og Krista hamraði frákastið í netið.

(Lýsingarnar eru fengnar af fésbókarsíðu Græna hersins)

3-1 heimasigur og stelpurnar komnar áfram í Borgunarbikar kvenna.

Hér koma myndir úr leiknum og eins og fyrr er hægt, með því að smella á þær, flett þeim og skoðað í stærri upplausn.

Lovísa Björk, Krista Eik og Særún Anna fagna síðara marki Kristu.

Karólína Pálsdóttir þrumar knettinum í átt að vítateig gestanna.

Særún Anna Brynjarsdóttir í baráttu við leikmann Einherja.

Krista Eik geysist fram völlinn í kapphlaupi við varnarmann Einherja.

Lovísa Björk Sigmarsdóttir og Dagbjört Ingvarsdóttir ásamt leikmanni Einherja.

Hulda Ösp Ágústsdóttir tekur aukaspyrnu rétt utan vítateigs.

Dagbjört fyrirliði í baráttu inn í teig. Arnhildur systir hennar við öllu búin.

Kristín Kjartansdóttir í vítateig andstæðinganna.

Bergdís Björk Jóhannsdóttir og Sigrún Vala Hauksdóttir fjær.

Halldór Ingólfsson og Valdimar Ingólfsson voru meðal áhorfenda og fylgjast hér spenntir með stelpunum.

Þórhallur Valur Benónýsson þjálfari Völsungs ánægður í leikslok.