Vel heppnað skíðagöngunámskeið

Góð þátttaka var á gönguskíðanámskeiðinu.

Um helgina stóð skíðagöngudeild Völsungs fyrir skíðagöngunámskeiði fyrir byrjendur jafnt sem lengra komna í íþróttinni.

Kennari á námskeiðinu var Einar Ólafsson, tvöfaldur ólympíufari í skíðagöngu.

Á heimasíðu Völsungs segir að mjög góð þátttaka hafi verið á námskeiðunum en 50 einstaklingar mættu á þau. Í heildina voru þetta fimm skipti auk þess sem farið var yfir brautlagningu í kringum og ofan við skála skíðagöngudeildarinnar við Reyðarárhnjúk.

Fram kemur á fésbókarsíðu skíðagöngudeildarinnar að miklar framfarir hafi verið sýnilegar hjá öllum þátttakendum og var mikil ánægja með leiðbeinandann Einar Ólafsson.

Að lokum var boðið upp á heitt kakó í aðstöðuskúrum skíðagöngudeildarinnar á félagssvæði deildarinnar við Reyðarárhnjúk.

Myndir frá námskeiðinu má finna inná fésbókarsíðu skíðagöngudeildarinnar undir nafninu skíðagöngudeild Völsungs eða með því að smella HÉR.