Útilistaverkum fjölgar í bænum

Feðgarnir að störfum við listaverkið.

Framan við inngang Kaupfélagshússins við Garðarsbraut er verið að koma fyrir listaverki sem einnig mun gegna því hlutverki að draga úr hættu á óhöppum vegna stallsins sem er fram af gangstéttinni og út á götuna.

Hönnuðurinn er Árni Árnason arkitekt á Akureyri, en hann hefur haft umsjón með allri hönnun og útliti við endurbætur á Kaupfélagshúsinu undanfarin ár.  

Að sögn hans heitir verkið  „BROT“  og er sótt í form húsþaka  á Húsavík sem eru svo ríkjandi fyrir bæinn. Þríhyrningsformið er þar alls ráðandi og er tekið upp í einstökum hlutum verksins og að lokum  myndar heildarverkið léttan og uppleystan þríhyrning.   

Árni sagði að það hafi verið ögrandi og spennandi verkefni að hanna jafn hversdagslegan hlut og gangstéttarhandrið svo úr yrði öðruvísi og spennandi verk.  Hann vill koma á framfæri þakklæti til húseigandans fyrir metnaðarfullt viðhorf til hönnunar bæði utanhúss og innan.

Smíði og uppsetning verksins var í höndum Agnars Kára Sævarssonar en einnig komu Garðvík ehf. og Norðurþing að verkinu. Garðvík sá um uppsetningu á undirstöðum og gerði upphækkunina sem handriðið stendur á en Birgir Axelsson skrúðgarðyrkjumeistari Garðvíkur sá um að hlaða vegginn.

Eftir á að mála listaverkið en Árni reiknaði með að það yrði gert á næstu dögum.

Eigendur hússins telja verkið vera til marks um ótrúlega þrautseigju Agnars Kára, og eins hve öll verk leika í höndunum á honum. Það sé þeim mikils virði að hann hafi tekið þetta að sér en synir hans, Sævar Veigar og Rafnar Berg, unnu að uppsetningunni með honum.

Það mun birtast mynd af verkinu hér á vefnum þegar það er fullklárað en hér að neðan er mynd sem Hörður Jónasson tók í gær.