Ungt fólk til athafna

Í gærdag var haldinn kynningarfundur í fundarsal Framsýnar þar sem Soffía Gísladóttir, forstöðumaður Vinnumálastofnunar á Norðurlands eystra kynnti verkefnið fyrir atvinnuleitendum hér á svæðinu í aldurshópnum 18-24 ára. Á fundinn mættu einnig fulltrúar þeirra aðila sem bjóða upp á virkniúrræði hér á svæðinu en það eru stéttarfélögin, Íþróttafélagið Völsungur, Framhaldsskólinn, Þekkingarsetrið, Rauði krossinn og Norðurþing. Í boði eru mörg mjög spennandi úrræði sem lögðust vel í þá sem fundinn sátu.

Alls mættu 19 atvinnuleitendur á kynningarfundinn og að honum loknum skráði hver og einn sig í það úrræði sem viðkomandi leist best á. Í þessu átaki er ekkert val um óvirkni, ef einstaklingarnir skrá sig ekki í úrræði veldur það bótamissi. Með þátttöku í úrræðunum halda þeir bótunum og verða um leið virkir þátttakendur í samfélaginu. Þetta átak á að koma í veg fyrir að ungir atvinnulausir einstaklingar einangrist. Það er trú okkar sem erum þátttakendur í verkefninu að félagsleg virkni gefi þessum einstaklingum betra tækifæri til að snúa aftur út á vinnumarkaðinn. Í raun er verið að gefa ungum atvinnuleitendum möguleika á að koma sér af stað í námi, öðlast starfsréttindi eða kynnast nýjum starfsvettvangi, sér að kostnaðarlausu.

Við hjá Framsýn höfum ákveðið að standa fyrir Opnu húsi alla virka daga milli kl. 10:00 og 12:00 þar sem atvinnuleitendur á öllum aldri eru velkomnir. Opna húsið hefst formlega fimmtudaginn 28. janúar. Stefnt er að því að einstaklingarnir sem eru komnir af stað í átaki Vinnumálastofnunar komi og hitti starfsmann Framsýnar í Opna húsinu hvern föstudag og ræði þar upplifun sína og skoðun á þeim virkniúrræðum sem þeir eru í.

Það er von okkar að þetta verkefni haldi þeim sem misst hafa vinnuna í virkni þangað til atvinnutækifærum fjölgar á nýjan leik.

Hilmar Valur Gunnarsson.