Umhverfismál verða í forgangi við Hótel Reykjahlíð

Reykjahlíð. Lj. Sigurður Stein.

Eins og fram hefur komið í fréttum festu Icelandair Hótel nýverið kaup á Hótel Reykjahlíð, og hyggjast endurreisa þetta elsta hótel í Mývatnssveit og bæta. 

Hótelið er á fallegum stað og tengingin við náttúruna skipar stóran sess í þeim áformum sem uppi eru um hótelið. Því verður hugað að öllum umhverfisþáttum í hvívetna og þá sérstaklega frárennslismálum.

Í fréttatilkynningu segir að Icelandair Hótel vinni markvisst að uppbyggingu innviða íslenskrar ferðaþjónustu sem er til þess fallin að laða að betur borgandi ferðamenn. Áform félagsins við Mývatn eru að byggja fallega, látlausa gistiaðstöðu sem býður upp á meiri þægindi og lúxus en nú þekkist, og er til þess fallin að efla þjónustu og atvinnusköpun innan svæðisins allt árið um kring. Það er ætlun eigenda að byggja látlausa byggingu þannig að upprunaleg bygging, sem er elsta hótelið við Mývatn, fái að njóta sín og verði eftir sem áður miðpunktur endurbætts  hótels. Leitast verður við að nota vistvæn efni með tengingu við náttúru staðarins. Þannig verða veggir klæddir með grárri viðarklæðningu og torf verður á þökum. Það er vilji eigenda að standa vel að framkvæmdinni og huga sérstaklega að fráveitumálum, með vísan í reglugerð nr. 665/2012 um verndun Mývatns og Laxár. Þannig verður allt skólp hreinsað með ítarlegri hreinsun, en tveggja þrepa hreinsun í samræmi við ákvæði 2. mgr. 7 gr reglugerðar um fráveitur og skólp. Meðvitað er hæð viðbygginga stillt í hóf  til að útsýni að vatninu frá aðalvegi haldist gott sem óskert frá því sem nú er. Viðbygging er því einungis á tveimur hæðum og heildarhæð hennar töluvert lægri en heimilt er í núverandi deiliskipulagi. Metnaður er lagður í að heildarútlit hótelsins verði svæðinu til framdráttar frá því sem nú er fremur en hitt, og að látlaust, umhverfisvænt útlit þess verði annarri framtíðaruppbyggingu við Mývatn til eftirbreytni, þar sem umhverfisvæn sjónarmið eru höfð að leiðarljósi.

Hótel Reykjahlíð er gömul bygging sem uppfyllir ekki lágmarkskröfur um gæði hótelgistingar í dag, enda verulega komin til ára sinna. Á hótelinu eru alls 9 herbergi. Upphaflega áform Icelandair Hotels voru að byggja 3 hæða viðbyggingu við hótel Reykjahlíð, í samræmi við heimild í núgildandi deiliskipulagi. Vegna mótmæla landeigenda var hinsvegar horfið frá þeim áformum, og viðbyggingar lækkaðar í 2 hæða byggingar. Núverandi tillaga Icelandair hótela um stækkun gerir þannig ráð fyrir alls 43 herbergja stækkun við hótelið.  Deiliskipulagstillaga þar að lútandi verður lögð fyrir í næstu viku og fer í framhaldi af því í umsagnar og athugasemda ferli.

Hjálagt er jafnframt bréf landeigenda sem jarðir eiga samliggjandi umræddri lóð sem Icelandair Hótel festu kaup á, þar sem stuðningur þeirra við áform félagsins er staðfestur.

Það liggur fyrir að grunnforsenda þess að farið verði í úrbætur á núverandi húsnæði, og rekstur hafin á heilsárshóteli við Mývatn, að þá þurfi bæði að stækka gistirýmið sem og gera verulegar úrbætur á núverandi húsnæði.

Gert er ráð fyrir að 20 heils árs störf verði til við tilkomu hótelsins og einnig er ljóst að rekstraraðili hótelsins þurfa að festa kaup á  húsnæði eða byggja nýbyggingu til að hýsa starfsfólk sitt. Framkvæmdin hefur því í för með sér margvísleg jákvæð áhrif fyrir atvinnulíf í sveitarfélaginu, og skapar jafnframt vettvang fyrir fleiri þjónustuaðila á svæðinu til að efla sinn rekstur.