Til stendur að stækka Jarðböðin við Mývatn

Til stendur að hefja framkvæmdir við nýtt og stærra baðhús og baðlón Jarðbaðanna við Mývatn á þessu ári.

Í ársreikningi félagsins segir að núverandi aðstaða anni vart lengur þeim fjölda sem heimsækir lónið. 

Greint er frá þessu á vef Viðskiptablaðsins.

Félagið hagnaðist um 168 milljónir króna á síðasta ári efir 83 milljóna tap árið 2020. Tekjur Jarðbaðanna námu 582 milljónum samanborið við 258 milljónir árið áður. 

Eignir félagsins námu 1,5 milljörðum í árslok 2021. Eigið fé var um 1,4 milljarðar en félagið er ekki með neinar langtímaskuldir. 

Félagið Norðurböð, sem hét áður Tækifæri, er stærsti hluthafi Jarðbaðanna með 43,8% hlut. Íslenskar heilsulindir, sem er í 60% eigu Bláa lónsins, fara með fjórðungshlut í Jarðböðunum og þá á Landsvirkjun 19% hlut.