Það er kúl að vera í kór

Það er kúl að vera í kór.

Það var mikil sönggleði á Húsavík um síðustu helgi þegar tæplega 300 ungmenni víðs vegar af landinu hittust á Landsmóti Barnarkóra.

Landsmótið er haldið annað hvert ár en Tónmenntakennarafélag Íslands, hefur haldið þessi mót í 40 ár og var þetta í 19. skipti.

Ásta Magnúsdóttir tónmenntakennari var mótsstjóri og segir hún mótið hafa farið vel fram í alla staði enda hafi hún verið búin að undirbúa það síðan í haust.

"Öll aðstaða hér á Húsavík er til fyrirmyndar til að taka á móti slíkum fjölda. Glæsilegt mötuneyti með fyrsta flokks matráð er í Borgarhólsskóla og höfðu gestirnir orð á því að aldrei hefði annars eins matur verið borið fram á Landsmóti. Þar á Hjördís Gústavsdóttir heiður skilið. 

Foreldrar Stúlknakórs Húsavíkur voru duglegir og stóðu vaktir í matsal, sáu um þrif og bakstur. Meðlimir kórsins voru leiðsögumenn og fylgdu öllum kórum hvort sem var á kóræfingar, í mat, sund eða á okkar frábæru söfn. 

Lára Sóley og Hjalti Jónsson voru leynigestir á laugardagskvöldinu og slógu heldur betur í gegn. Móttökurnar voru líkt og Bítlaæðið hér forðum. Line og Adrienne kenndu Afródans á kvöldvökunni og ég kenndi Zumba. 

Norðurþing stykti þetta mót og á heiður skilið fyrir afnot af Höllinni, sundlaug og skólanum. Norðlenska, Heimabakarí, Framsýn og fleiri og fleiri styrktu okkur og ég sendi hér með bestu þakkir fyrir”. Segir Ásta.

Lokatónleikar þar sem allir kórarnir sungu saman voru haldnir í Íþróttahöllinni á sunnudeginum. Þar voru sungin þau lög sem kennd voru á laugardeginum í þremur mismunandi þyngdarflokkum.

Byrjað var á óundirbúnu lagi sem þó allir kunnu, nefnilega Cup song úr kóramyndinni Pitch Perfect. Þema laganna í ár voru nefnilega lög úr bíómyndum og söngleikjum, sem er sérlegt áhugasvið Ástu. 

Hólmfríður Benediktsdóttir móðir Ástu stjórnaði kórunum þegar sungin voru tvö lög eftir Steina í Hlyn. Steingrímur Þórhallsson, sem hóf píanónám hjá Hóffý aðeins 7 ára gamall, var undirleikari, en hann var þarna mættur með Stúlknakór Neskirkju.

“Ég var búin að ákveða að Heiðra skyldi Hóffý og því fékk ég alla gesti til þess að rísa á fætur henni til heiður og syngja uppáhalds lag hennar, Maístjörnuna. 

Hóffý er að hætta kennslu nú í vor eftir 45 ára farsælan feril, lengst af hér á Húsavík, sem söngkennari, kórstjóri og tónmenntakennari. Það var því viðeigandi að hún væri verndari Landsmótsins og ekki amalegt að fá yfir 400 manns til þess að syngja fyrir hana Maístjörnuna.

Það er mál manna að aldrei hafi verið eins veglegt og vel undirbúið Landsmót. Húsvíkingar sýndu mikla gestrisni og með samheldnu átaki tókst okkur að gera þetta saman. Tónleikarnir voru vel sóttir og tókust með endemum vel. Bestu þakkir til allra”. Sagði Ásta Magnúsdóttir af 3. kynslóð kórstjóra á Húsavík og bætti við "Það er kúl að vera í kór".

Hátt í 300 ungmenni komu saman á Landsmóti barnakóra.

Hólmfríður Benediktsdóttir var verndari mótsins og stjórnaði kórunum í tveim lögum eftir Steina í Hlyn.

Steingrímur Þórhallsson lék undir í þeim lögum en hann hóf sitt píanónám sjö ára gamall hjá Hólmfríði.

Hólmfríður var heiðruð með þvi að kórarnir og viðstaddir sungu Maístjörnuna við undirleik Ástu dóttur hennar.

Steingrímur, Hólmfríður og Ásta gáfu sér tíma til myndatöku.