Tengir leggur ljósleiðara í Norðurþingi – Núna er komið að Húsavík

Tengir hefur frá árinu 2002 unnið að lagningu ljósleiðara víða um norður- og norðausturland, þar með talið dreifbýli Norðurþings.

Nú er vinnu í dreifbýlinu að mestu lokið og komið að því að leggja meiri áherslu á stærri þéttbýlisstaði þar sem koparnet er að mestu eða jafnvel eingöngu í boði, þar með talin Húsavík.

Tengir hefur áður unnið að uppbyggingu ljósleiðara á Húsavík, aðstoðaði meðal annars Orkuveitu Húsavíkur og Sveitarfélagið við að leggja og tengja ljósleiðara til helstu stofnana Húsavíkur, s.s. HSN, framhaldsskólans, grunnskólans, leikskóla, sveitastjórnarskrifstofu og nokkurra fyrirtækja. 

Tilhögun framkvæmda

Tengir hefur frá upphafi lagt mikinn metnað í að valda sem minnstu jarðraski við lagningu ljósleiðara og hefur þar af leiðandi fjárfest í mjög sérhæfðum tækjum og vélum gegnum árin. Fjarskiptafyrirtækjum ber hins vegar að samnýta framkvæmdir sé þess kostur og var því ákveðið að hafa svipað fyrirkomulag í þessum fyrsta áfanga við lagningu ljósleiðara til heimila á Húsavík, eins og hefur verið viðhaft á suðurlandi milli Gagnaveitu Reykjavíkur og Mílu um nokkurt skeið. Tengir og Míla sóttu því sameiginlega um leyfi til samkeppnisstofnunar til að geta framkvæmt þennan áfanga í samstarfi, þ.e. leggja ljósleiðara beggja félaga í sömu framkvæmd inn á 320 heimili á Húsavík fyrir lok árs 2019. Drög félaganna að samningi voru lögð fram, þar sem verkskipting var útlistuð, fasteignir tilgreindar sem og þær upphæðir sem Tengir myndi greiða Mílu fyrir aðgang að fyrirliggjandi innviðum Mílu og vinnu verktaka við framkvæmdina.

Míla tilkynnti Tengir að fjölbýlishúsin sem væru í samningsdrögum yrðu undanskilin samningi þessum og Tengir þyrfti sjálfur að framkvæmd þann hluta. Það reyndist kostnaðarsamara fyrir Tengir að nýta innviði Mílu, sem voru til staðar að hluta, en að fá heimaverktaka á Húsavík til að vinna verkið frá grunni. Þrátt fyrir þetta er framkvæmdin nú vel á veg komin, en hún er unnin í samstarfi við Vinnuvélar Eyþórs á Húsavík. Ljósleiðari Tengis er kominn inn í öll fjölbýlishús í Garðarsbraut 67-83 og vinna við innanhúslagnir fyrir viðskiptavini hafin. Vonir standa til að lagningu röra fyrir ljósleiðara ljúki í þessari viku í fjölbýlishúsunum í Grundargarði og geta íbúar þar því einnig tengst Ljósleiðara Tengis á næstu dögum.

Þau heimili sem tilheyra samstarfi Mílu og Tengis verða tilbúin til tengingar á næstu vikum, en þar á meðal eru heimili í Árgötu, Ásgarðsvegi, Garðarsbraut, Mararbraut, Skólagarði og Túngötu.  

Metnaðarfull framkvæmd

Uppbyggingu Ljósleiðara Tengis á Húsavík fylgir mikil vinna á mörgum sviðum, m.a. við hönnun kerfis, samsetningu ljósleiðarastrengja í tengibrunnum víða um bæinn og uppsetningu búnaðar Tengis í nýrri aðstöðu sem félagið er að koma sér upp í Garðarsbraut 21. Þá er ótalin vinna inni á heimilum viðskiptavina. Á því svæði þar sem Tengir og Míla eiga í samstarfi er verkið í umsjón Hljóðverks, þ.e. Kristjáns Stefáns Halldórssonar (Kidda), en starfsmenn Tengis og verktakar þess, Netkerfi og tölvur, sjá um alla vinnu við að tengja ljósleiðarann í tengibrunnum, stöðvum og inni á heimilum viðskiptavina. 

Kostnaður vegna innanhúslagna

Lagning Ljósleiðara Tengis á Húsavík er viðskiptavinum að kostnaðarlausu, þ.e. ljósleiðarinn er settur upp í svo kallað inntaksbox, inni í fasteign viðskiptavinar án kostnaðar. Í fjölbýlishúsum þarf að leggja frá inntaksboxi í sameign og upp í íbúð viðskiptavina, en þær lagnir eru eign og á ábyrgð húseiganda. Tengir býður viðskiptavinum sínum tilboð við innanhúslagnir, þannig að íbúar í fjölbýlishúsum greiða kr. 24.000,- m/vsk. sem er sama verð og íbúum í fjölbýlishúsum á Akureyri býðst. 

Viðskiptavinir Tengis í einbýlishúsum geta fengið Ljósleiðara Tengis án kostnaðar innan ákveðinna skilmarka, þar sem oftast nær verður mögulegt að setja upp búnað eins og ljósbreytu og router/netbeini, nálægt inntaksboxi ljósleiðarans. 

Viðskiptavinir á Ljósleiðara Tengis geta verið hjá öllum þjónustuveitum sem bjóða þjónustu sína á Húsavík, t.d. Hringdu, Hringiðunni, Nova, Símanum og Vodafone. Þannig getur viðskiptavinur haldið sinni þjónustu óbreyttri við flutning yfir á Ljósleiðara Tengis – að því undanskildu að þjónustan verður bara betri, með margfalt öflugra og traustara sambandi alla leið heim í stofu!