Tæplega 90 manns þreyttu Mývatnsmaraþonið

Það voru tæplega 90 manns sem þreyttu Mývatnsmaraþon laugardaginn 4. júní sl.

Keppt var í blíðskaparveðri, í maraþoni, hálf maraþoni, 10 km og 3 km. Hlaupið hófst og endaði í Jarðböðunum við Mývatn og hlaupið var eftir þjóðveginum í kringum Mývatn.

Keppendur komu frá 9 löndum, frá Þýskalandi, Frakklandi, Bretlandi, Japan, Kanada, Póllandi, Rússlandi, Bandaríkjunum og Íslandi.

Laurent Conseil frá Frakklandi kom fyrstur í mark í maraþoninu á tímanum 3:57:52 og fyrst kvenna var Véronique Chenu frá Frakklandi en hún hljóp maraþonið á 4:17:31. Úrslit Mývatnsmaraþons má finna á hlaup.is

Mývatnsmaraþon er frábær upplifun þar sem náttúran spilar stórt hlutverk. Það reynir vel á þol og styrk hlaupara í Mývatnsmaraþoni þar sem endaspretturinn getur tekið á. En þátttakendur maraþonsins gátu notið þess að slaka á eftir átökin í Jarðböðunum þar sem miði í böðin var innifalinn í þátttökugjaldinu. Auk þess fengu allir þátttakendur sem luku keppni þátttökupening, stuttermabol merktan hlaupinu og grillveislu. Í lok verðlaunaafhendingar voru veitt sérstök útdráttarverðlaun frá ferðaþjónustuaðilum í Mývatnssveit.

Í tilkynningu segir að aðstandendur Mývatnsmaraþonsins vilji nota tækifærið og þakka öllum þeim sem komu að skipulagningu hlaupsins og styrktaraðilum.

Stefnt er á að halda næsta Mývatnsmaraþon laugardaginn 3. júní 2017.