Sveitarstjóri Norðurþings kynnti sér stækkun Silfurstjörnunnar

Katrín Sigurjónsdóttir. Lj. samherji.is

Verklegum framkvæmdum við stækkun landeldisstöðvar Fiskeldis Samherja í Öxarfirði, Silfurstjörnunnar, miðar vel áfram. 

Katrín Sigurjónsdóttir nýr sveitarstjóri Norðurþings kynnti sér framkvæmdirnar, sem eru þær viðamestu í sveitarfélaginu á þessu ári. Hún segir að stækkunin komi til með að styrkja atvinnulífið á svæðinu, enda Silfurstjarnan stærsti vinnustaðurinn í Öxarfirði á eftir sjálfu sveitarfélaginu.

Frá þessu er greint á heimasíðu Samherja.

Stækkunin skilar sér í þingeyska hagkerfið

Katrín Sigurjónsdóttir„Mér líst mjög vel á þetta allt saman. Silfurstjarnan er rótgróið fyrirtæki, sem þýðir að með árunum hefur safnast upp verðmæt þekking meðal starfsfólksins, sem nýtist vel við framkvæmdirnar og síðast en ekki síst til framtíðar. Öxarfjörður hentar afskaplega vel til landeldis, hérna er nóg af heitu og köldu vatni og stutt er í hreint og tært Atlantshafið. Stærsti verktakinn er byggingafélagið Rein í Norðurþingi, auk þess sem fjöldi smærri verktaka í sveitarfélaginu koma að stækkuninni. Allt þetta skilar sér með einum eða öðrum hætti beint inn í þingeyska hagkerfið.“

Stækkunin styrkir atvinnulífið

„Fyrir mig var þessi heimsókn ákaflega ánægjuleg. Ég fylgdist vel með byggingu nýs fiskvinnsluhúss Samherja á Dalvík, þar var afskaplega myndarlega staðið að öllum þáttum. Sama er uppi á teningnum hérna í Öxarfirði. Síðan bind ég auðvitað vonir við að starfsemin skapi önnur tækifæri í atvinnu- og búsetumálum hérna á svæðinu í framtíðinni. Ég heyri ekki annað á íbúunum en að stækkunin komi til með að styrkja atvinnulífið og svæðið allt,“ segir Katrín Sigurjónsdóttir í frétt á heimasíðu Samherja.