Styrktarsamningur undirritaður hjá Gentle Giants um doktorsrannsóknir á hvölum

13. maí

Styrktarsamningur undirritaður hjá Gentle Giants um doktorsrannsóknir á hvölum
Fréttatilkynning - - Lestrar 431

Jóhanna S. Svavarsdóttir og Charla Basran.

Hvalaskoðunarfyrirtækið Gentle Giants á Húsavík skrifaði nýlega undir styrktarsamning við Chörlu Basran frá Kanada fyrir doktors-verkefni hennar um hvali á Skjálfandaflóa.

Charla, sem er sérfræðingur í hnúfubökum, hefur starfað sem leiðsögumaður um borð í bátum félagsins.

Hún hefur nú hafið vinnu við doktorsritgerð sína sem fjallar um meðafla sjávarspendýra í fiskveiðum við Ísland og sjávarspendýr sem flækjast í veiðarfærum.

Markmið rannsóknarinnar er að finna leiðir hvernig draga megi úr þessum vanda.

Einn liður í rannsóknarvinnunni er að fara í hvalaskoðunarferðir á vegum Gentle Giants og mynda hnúfubaka í Skjálfandaflóa til þess að bera kennsl á og að greina umfang þeirra sem flækst hafa í veiðarfærum.

„Þetta er spennandi verkefni og við erum mjög stolt að styðja við slíka rannsóknarvinnu“, segir Jóhanna S. Svavarsdóttir, starfsmannastjóri Gentle Giants.