Styrktarfélag HSN í Þingeyjarsýslum orðið almannaheillafélag

Kristján Önundarson og Daníel Borgþórsson.

Á dögunum var haldinn aðalfundur Styrktarfélags HSN í Þingeyjarsýslum í húsakynnum Heilbrigðisstofnunar Norðurlands á Húsavík. 

Þar kynnti stjórn félagsins þau verkefni sem unnið var að á síðastliðnu starfsári félagsins auk þess sem afhent voru þakkarbréf til helstu styrktaraðila.

Kom fram í máli formanns að félagið hafi notið góðs stuðnings frá félagasamtökum, fyrirtækjum og einstaklingum á síðasta ári auk þess sem sala minningarkorta hafi gengið vel.  Alls hafi tekjur félagsins á árinu 2023 numið rétt um 12 milljónum króna og félagið hafi fjármagnað gjafir til starfsstöðva HSN í Þingeyjarsýslum fyrir rúmlega 13 milljónir króna á síðasta ári.

Á fundinum var svo formlega tilkynnt að Styrktarfélagið er nú komið á almannaheillaskrá Skattsins.  Það þýðir að fjárframlög einstaklinga og fyrirtækja til félagsins eru frádráttarbær frá skattstofni styrktaraðila.  Vonar stjórn félagsins að þetta verði enn frekari hvati fyrir íbúa og fyrirtæki á svæðinu að styðja við félagið og hjálpa því að bæta heilbrigðisþjónustu hér heima í héraði.

Jón Helgi Björnsson, forstjóri HSN, tók til máls og þakkaði fyrir hönd stofnunarinnar fyrir þær gjafir sem félagið hefur gefið á árinu.  Hann sagði það skipta gríðarlegu miklu máli að stofnunin geti endurnýjað lækningartæki og annan búnað svo hægt sé að halda uppi góðri þjónustu og laða að hæft starfsfólk til að sinna sjúklingum á svæðinu.

Á starfsárinu var sett upp facebook síða félagsins þar sem miðlað verður upplýsingum um starfsemi félagsins.  Slóðin á síðuna er https://www.facebook.com/styrktarfelagHSN/. 

Þar er hægt að nálgast eyðublað til að skrá sig sem styrktaraðila.

Kristján Önundarson tv. tók við þakkarbréfi fyrir hönd móður sinnar Unu Þórdísar Elíasdóttur styrktaraðila félagsins.