Stelpurnar í 4. flokki Stefnumótsmeistarar

Stelpurnar fagna sigrinum.

Stelpurnar í 4. flokki kvenna tóku þátt í Stefnumóti KA í knattspyrnu um helgina.

Mótið fór fram í Boganum á Akureyri og stóð frá föstudegi til sunnudags.

Stelpurnar sem tóku þátt voru 15 talsins og óhætt að segja að þær hafi staðið sig vel.

Á heimasíðu Völsungs segir að liðið hafi spilaði 4 leiki í riðlakeppni á föstudag og laugardag, þar mættu þær liðum KA, Þór 1, Þór 2 og Tindastóls. Eftir þessar viðureignir voru þær í öðru sæti eftir að hafa unnið 3 leiki og tapað einum. Það var því ljóst að liðið myndi spila til úrslita í mótinu á sunnudag við Þór 1 sem þær höfðu tapað fyrir 2-3 í fyrsta leik mótsins.

Spennustigið var hátt fyrir leikinn en þrátt fyrir það náði liðið að leika vel í fyrrihálfleik og var 1-0 yfir í hálfleik. Í seinni hálfleik gerðu Þórsstelpur harða hríð að marki okkar en hetjuleg barátta liðsins og þrautseigja allt til enda skilaði sigri og þar með 1. sætinu í mótinu.  

Skemmtilegur endir á góðu móti hjá liðinu, það sem mestu máli skiptir þó er að stelpurnar bættu sig mikið, sýndu mikinn dugnað og vilja og því uppskáru þær sem raun ber vitni.

Hægt er að skoða myndir frá mótinu hér