Sölkusiglingar bæta við sig bát í hvalaskoðuninaAlmennt - - Lestrar 577
Sölkusiglingar ehf. á Húsavík festu kaup á 30 tonna eikarbát fyrr í haust og mun hann fá nafnið Salka. Báturinn mun hefja siglingar með ferðamenn á Skjálfanda næsta vor.
Þeir Sölkumenn voru búnir að hafa augastað á bátnum, sem heitir Pétur afi, um tíma en hann hefur legið í reiðileysi við bryggju í Skipavík í Stykkishólmi undanfarin ár. Hann var smíðaður 1976 hjá Dröfn í Hafnarfirði.
“Við erum að bæta við okkur bát vegna þess að það voru allt of margar ferðir uppseldar hjá okkur í sumar. Vegna góðrar nýtingar og eftirspurnar í stuttu máli en við fáum margar fyrirspurnir um hvalaskoðunarferðir og mat á Sölku sem við þurfum að mæta". Segir Börkur Emilsson hjá Sölkusiglingum sem fyrir gerir út hvalaskoðunarbátinn Fanney.
"Við tókum bátinn í slipp í Skipavík í Stykkishólmi og komum til með að gera hann upp þar í vetur. Ætlunin var að gera sjóklárann og sigla honum að því loknu til Húsavíkur til viðgerðar en síðan var okkur boðið að gera við hann inni í Skipavík sem við og þáðum.
Þú getur svo skrifað að þetta verði líklega flottasti bátur á Húsavík þegar kokkurinn verður búinn að græja hann". Sagði Börkur skellihlæjandi í lok samtals við vefstjóra.
Pétur afi kominn upp í slipp í Skipavík. Ljósmyndir Börkur Emilsson.
Skrokkur Péturs afa er betri en reiknað var með að sögn Barkar.
Pétur afi mun fá nafnið Salka og verða tilbúinn í byrjun maí 2017.