Sigur í fyrsta heimaleik hjá strákunum-Stelpurnar náðu í þrjú stig til Hornafjarðar

Steinþór Már skorar úr vítinu.

Þetta var góð helgi hjá meistara-flokkum Völsungs í knattspyrnu, bæði lið sigruðu sína leiki.

Strákarnir mættu Dalvík/Reyni á Húsavíkurvelli í gær og sigruðu 3-2. Bjarki Baldvinsson náði forystunni á ´23 mín. leiksins með marki úr vítaspyrnu en gestirnir jöfnuðu í næstu sókn. Þar var að verki Viktor Már Jónasson.

Elvar Baldvinsson skoraði annað mark Völsunga rétt fyrir hálfleik og Aðalsteinn Jóhann Friðriksson það þriða fljótlega í seinni hálfleik. Gestirnir fengu síðan vítaspyrnu á ´70 mín. og fyrrverandi markmaður Völsungs Steinþór Már Auðunsson skoraði úr henni af öryggi. 

Þrátt fyrir góðan sigur þá var hann ekki áfallalaus því Sigvaldi Þór Einarsson var borinn meiddur af velli á ´11 mínútu leiksins.

Elvar Baldvinsson skoraði annað mark Völsunga.

Stelpurnar fóru til Hornafjarðar og léku gegn Sindra á föstudagskvöldinu. Lovísa Björk Sigmarsdóttir og Dagbjört Ingvarsdóttir skoruðu mörk Völsunga sem unnu 2-0. Lovísa Björk á ´19 mín. leiksins og Dagbjört í blálokin.

Stelpurnar komu heim úr þessu langa ferðalagi um miðja nótt en voru mættar gallvaskar í kappróðurinn í gær og kepptu innbyrðis, þær eldri við hinar yngri. Og til að gera langa sögu stutta höfðu þær eldri betur.

Þær eldri höfðu betur með Hörpu við stýrið.

Þær yngri koma í mark undir stjórn Brynju Matthildar Brynjarsdóttur.