Piramus og Þispa frumsýnir Þú ert í blóma lífsins, fíflið þitt í kvöld

Kristný Ósk Geirsdóttir leikur Lillu.

Leikfélag FSH, Piramus og Þispa, frumsýnir leikritið Þú ert í blóma lífsins, fíflið þitt í Samkomuhúsinu í kvöld. 

Leikstjóri er Jóhann Kristinn Gunnarsson en Davíð Þór Jónsson samdi leikriti í samstarfi við unglingadeild Leikfélags Hafnarfjarðar árið 1990.

Það hefur síðan verið sýnt út um allt land af áhugaleikfélögum og í framhaldsskólum.

En hvað segir leikstjórinn um verkið, leikhópinn og sýninguna ? Gefum Jóa orðið.

"Segja má að verkið sé háðsádeila á íslenskt fjölskyldulíf sem og uppvaxtarárin uns stúdentsnámi er lokið. Við fáum að fylgjast með lífi Lillu frá getnaði til loka framhaldsskólans. Nú eru þetta nokkur ár og því má segja að við séum að hraðspóla í gegnum þennan tíma. Við skyggnumst inn í líf fjölskyldu hennar og sjáum hvernig henni og vinum hennar reiðir af í skóla og flestu sem fylgir því að vaxa úr grasi, slíta barnsskónum.

Lilla er jarðbundin stelpa sem í barnslegri hreinskilni sinni spyr spurninganna sem okkur langar flestum að spyrja, en sleppum því yfirleitt. Þessi eðlilega fróðleiksfýsn fellur ekki alltaf í kramið hjá eldri kynslóðinni enda er lang „þægilegast“ þegar krakkar og unglingar þegja bara og hlýða.

Píramus og Þispa er gamalgróið leikfélag Framhaldsskólans á Húsavík og hefur sett upp ótal frábærar sýningar. Hópurinn að þessu sinni er geysiskemmtilegur, fjölhæfur og hæfileikaríkur. Það er gaman að fylgjast með þeim skína á sviðinu, brjótast útfyrir þægindarammann og leyfa sér að leika, túlka og skemmta okkur – og ykkur.

Sýningin er hæfileg samsuða af gríni, glensi og spaugi með dass af hárfínni ádeilu á okkur öll sem byggjum þetta land. Það er algjörlega klárt að allir gestir leikhússins í þetta skiptið finna sjálfa sig eða aðstæður í verkinu sem þeir kannast meira en lítið við. Persónurnar eru æði skrautlegar og mjög ýktar meðan Lilla er þessi jarðbundna, hreinskilna stelpa sem reynir að átta sig á öllum þeim hraða og hrærigraut sem lífið er. Það á yfirleitt vel við að gera grín af okkur sjálfum. Nútíminn er trunta en bikkjan sú arna er orðin ansi hraðskreið. Yfirleitt náum við ekki að njóta augnabliksins fyrr en löngu seinna. Það á vel við í dag að hraðspóla í gegnum uppvaxtarárin á sviðinu í gamla samkomuhúsinu sem hefur alið upp margar kynslóðir leikara og annarra talenta í gegnum tíðina.

Á meðan við finnum okkur í hinum og þessum persónum verksins, hlæjum og skemmtum okkur með leikurunum á sviðinu þá verður ekki hjá því komist að finna tenginguna við Lillu og vangaveltur hennar. Það er klárlega Lilla innra með okkur öllum". Segir Jói en það eru 20 leikarar á sviðinu og vel á fjórða tug nemenda sem koma að uppsetningunni.

Hér að neðan eru nokkrar myndir sem ljósmyndari 640.is tók á æfingu í vikunni.

Með því að smella á myndirnar er hægt að fletta þeim og skoða í stærri upplausn.