Myndir frá opnun Krambúðarinnar

Gunnar Egill og Kristján Þór sem klippti á borðann

 Eins og áður hefur komið fram á 640.is opnaði Samkaup verslunina Krambúðina að Garðarsbraut 5 föstudaginn 29. apríl sl.

Í tilkynningu segir m.a að verslunin verði rekin á sömu forsendum og Krambúðin á Skólavörðustíg í Reykjavík sem tók miklum breytingum í lok árs 2015. Voru þær breytingar gerðar til þess að mæta aukinni eftirspurn frá nærumhverfinu en einnig til þess að þjónusta aukinn fjölda ferðamanna sem leggur leið síðna um Skólavörðustíginn.

Hönnun Krambúðarinnar miðast að því að vísa til íslenskrar náttúru þar sem birki, grjót, hraun og sina ræður ríkjum. Andrúmsloftið er létt með einföldu og stílhreinu litavali og upplifunin tekur mið af því. Vöruval er mjög fjölbreytt sem og opnunartími verslunarinnar. Hið sama á við um nýju verslunina á Húsavík en opnunartími hennar verður langur, eða frá kl.08.00 – kl.22.00 alla daga vikunnar.

Lagt er upp með að viðskiptavinir geti orðið sér út um þær vörur sem þarf til heimilisins hverju sinni. Fyrir fólk á ferðinni eða þá sem vantar skyndilausnir verður boðið uppá bakað á staðnum, tilbúna rétti, samlokur, tilbúin salöt, kaffi o.s.fr.

Ljósmyndari 640.is var á staðnum og tók myndir en þar sem vefstjóri 640.is, sem er einn og sami maðurinn, brá sér af bæ um tíma drógst að birta fréttin en hér koma nokkrar myndir frá opnunni.

Með því að smella á myndirnar er hægt að fletta þeim og skoða í stærri upplausn. 

Áður en formleg opnun Krambúðarinnar fór fram notaði Samkaup tækifærið og framlengdi samstarfssamning sinn við knattspyrnudeild Völsungs um eitt ár. Samkaup hefur styrkt við bakið á knattspyrnudeild meistaraflokka að undaförnu og er mikil ánægja með samstarfið meðal beggja aðila.

Það voru Jónas Halldór Friðriksson, framkvæmdastjóri Völsungs, og Erna Dröfn Haraldsdóttir, markaðsstjóri Samkaupa, sem undirrituðu samninginn.

Gunnar Egill Sigurðsson forstöðumaður verlsunarsviðs Samkaupa flutti smá tölu við opnunina. Gísli Gíslason rekstrarstjóri Úrvals og sérverslana hlýðir á.

Starfsfólk Krambúðarinnar ásamt fulltrúum Samkaupa.

Kristján Þór Magnússon sveitarstjóri Norðurþings klippti á borðann.

Fjölmenni var við opnunina og hér ganga viðskiptavinir inn í Krambúðina.

Ingunn Ólína Aðalsteinsdóttir afgreiðir fyrsta viðskiptavin Krambúðarinnar sem var Sigurhanna Salómonsdóttir.

Völsungarnir Nína Björk Friðriksdóttir og Lovísa Björk Sigmarsdóttir brostu sínu blíðasta þar sem þær dreifðu leikjamiðum til viðskiptavina.

Gunnar Egill á tali við foreldra sína Sigurð Aðalgeirsson og Sigurhönnu Salómonsdóttur.

Davíð Helgi Davíðsson og Guðmundur Kristjánsson frá Norðlenska grilluðu pylsur handa gestum og gangandi.