Mynd dagsins - Þakkað fyrir veittan stuðning

Mynd dagsins var tekin fyrir helgi þegar björgunarsveitarmenn knúðu dyra hjá þeim heiðurs-hjónum Jóni Sveini Þórólfssyni og Sigríði Baldursdóttur.

Þarna voru á ferðinni formaður björgunarsveitarinnar Birgir Mikaelsson og gjaldkerinn Júlíus Stefánsson en erindi þeirra var að þakka þeim veittan stuðning við sveitina.

Þannig var mál með vexti að í vetur sem leið varð Jón Sveinn níræður en Covidástandið kom í veg fyrir allt samkomuhald. Þau hjónin ákváðu því að styrkja Björgunarsveitina Garðar á Húsavík, Stefán í Mývatnssveit og Þingey í Þingeyjarsveit, hverja um sig, um þúsund krónur fyrir hvert æviár Jóns Sveins.

Jón Sveinn er dyggur stuðningsmaður björgunarsveitanna og starfaði í Þingey, sem hann stofnaði ásamt fleirum, þegar þau bjuggu í Bárðardal. Þá er hann kappsamur með prjónana og þau eru ófá ullarsokkapörin sem hann hefur gefið björgunarsveitinni Garðari. 

Birgir Mikaelsson og Júlíus Stefánsson afhenda hér Jóni Sveini og Sigríði þakklætisvott fyrir stuðning þeirra við björgunarsveitina Garðar. 

Með því að smella á myndina er hægt að skoða hana í hærri upplausn.