Ljósin tendruð á jólatré Húsvíkinga

Ljósin voru tendruð á jólatrénu í dag.

Ljós­in voru tendruð á jóla­tré Hús­vík­inga síðdeg­is í dag að viðstöddu fjölmenni.

Um sann­kallað bæj­ar­jóla­tré er að ræða, en tréð kem­ur úr skóg­lendi í bæj­ar­land­inu og eins og áður hefur komið fram á 640.is er það í fyrsta skipti sem bær­inn er sjálf­bær við að út­vega sér jóla­tré.

Önnur jóla­tré á veg­um sveit­ar­fé­lags­ins Norðurþings í ár koma einnig úr þess­um skógi.

Dag­skrá­in er ljós­in voru tendruð var nokkuð hefðbund­in og í um­sjá ungra knatt­spyrnuiðkenda Völsungs sem sungu líka nokk­ur jóla­lög við þetta tæki­færi. Kristján Þór Magnús­son, sveit­ar­stjóri Norðurþings, ávarpaði þá sam­kom­una og tendraði síðan ljósin.

Séra Jón Ármann Gísla­son á Skinnastað flutti stutta hug­vekju og kon­ur úr Soroptim­ista­fé­lag­inu voru að venju á staðnum með heitt kakó og pip­ar­kök­ur.

Þá gerðu jóla­svein­ar sér ferð til byggða í fyrra fallinu til að syngja með bæj­ar­bú­um, ganga í kring­um jóla­tréð og færa ungviðinu fagurrauð jólaepli.

Jólatréð í ár kemur úr skóglendi bæjarins og sitt sýnist hverjum um útlit þess, að venju.

Séra Jón Ármann flutti hugvekju.

Jólasveinar komu til byggða með epli í pokum.

Stúfur.

Með því að smella á myndirnar er hægt að fletta þeim og skoða í stærri upplausn.