Ljósbogaofnarnir munu heita Birta og Bogi

3/4 nafnefndar að störfum.

Nú hefur vinningshafi í samkeppni PCC BakkaSilicon um ljósbogaofna kísliversins verið valinn af skipaðri nefnd.

Nöfn ofnanna verða Birta og Bogi og vinningshafi er Elma Sif.

Í verðlaun er máltíð á Fosshótel fyrir fjóra. Útskýringin sem fylgdi tillögunni var að þessi nöfn pössuðu þeim vel í ljósi þess að þetta eru ljós-boga-ofnar.

Rökstuðningur nefndar: Orðin hljóma vel saman, hafa jákvæða merkingu, og vísa beint í starfsemi ofnanna. Nokkrar tillögur á nafninu Bogi bárust en nefndinni þótti Birta fara best við og að auki vísar það til bjarta ljóssins í ofninum. Mörg áhugaverð nöfn bárust og þótti nefndinni einstaklega erfitt að velja. Tvær samsetningar stóðu uppúr, en þessi samsetning var valin að lokum. 

Tvennir aukavinningar, máltíð á Fosshótel fyrir tvo, voru dregnir af handahófi og voru það tillögur frá Elísabetu Gunnarsdóttur og Rafnari Orra. Við munum hafa samband við þau og óskum þeim til hamingju með verðlaunin. 

Á heimasíðu PCC BakkaSilocon segir að í ljósi þess að starfsmaður þess vann keppnina vill fyrirtækið benda á að nefndin fékk tillögur á borð til sín algjörlega nafnlaust og var þetta því valið í blindni. Hins vegar ákváðu stjórnendur PCC BakkiSilicon að draga út annan stóran vinning af handahófi og er það Sigurður Kristjánsson sem var dreginn og fær hann máltíð fyrir fjóra á Fosshótel að launum. 

Nefndina skipuðu Berta María Hreinsdóttir, Dóra Ármannsdóttir, Kristján Þór Magnússon og Sigurjón Jóhannesson.