Landsmót Barnakóra á Húsavík um helgina

30. apr

Landsmót Barnakóra á Húsavík um helgina
Fréttatilkynning - - Lestrar 482

Stúlknakór Húsavíkur.

Landsmót Barnakóra verður haldið á Húsavík um komandi helgi og koma þar saman yfir 300 börn frá öllu landinu ásamt fylgdarliði.

Tónmenntakennarafélag stendur að mótinu sem haldið er annað hvert ár. Venjan er að halda það til skiptis á höfuðborgarsvæðinu og á landsbyggðinni.

Stúlknakór Húsavíkur eru gestgjafar og munu sinna því hlutverki með sóma ásamt foreldrum sínum. Verkefninu er stýrt af Ástu Magnúsdóttu kórstjóra og tónmenntakennara sem tók við Stúlknakórnum síðastliðið haust. Það eru 26 stúlkur í kórnum og vonandi bætast fleiri við næsta vetur.

"Á síðasta Landsmóti, sem haldið var í Kársnesskóla, var ég spurð hvort ég gæti ekki tekið að mér næstu mótstjórn og halda það á Akureyri. Að sjálfsögðu tók ég vel í það en þar sem ég flutti á mínar heimaslóðir síðasta sumar þá fluttist Landsmótið með mér hingað.

Það var afskaplega vel tekið í þessa hugmynd mína alls staðar hér í stjórnsýslunni. Norðlenska styrkir okkur ásamt Heimabakaríi. Einnig er búið að bjóða öllum gestum okkar bæði á Hvalasafnið og Geimfarasafnið ásamt því að allir fara í sund. Þetta verður fjölmennt mót og sungin verða lög úr bíómyndum og söngleikjum". Segir Ásta en verndari Landsmótsins í ár er Hólmfríður Ben. sem er að ljúka störfum við Tónlistarskóla Húsavíkur sökum aldurs.

Það er ekki slæmt að hafa slíkan reynslubolta með í skipulaginu. Hún er búin að fara á fjölda mörg Landsmót í gegnum tíðina með húsvísk ungmenni.

Tónleikar verða haldnir í höllinni kl.13 á sunnudag, 3.maí.

Allir eru velkomnir og frítt inn. Endilega fjölmennið á tónleikana en öll fjölskyldan mun hafa gaman af. Þetta er létt og skemmtilegt prógram sem verður unnið um helgina.

« Til baka