Kvenfélagið Aldan styrkir nærsamfélagið

Birgir formaður Bjsv. Garðars tók við gjöfinni.

Í Kvenfélaginu Öldunni á Tjörnesi eru starfandi tuttugu konur búsettar á Tjörnesi og Húsavík.

Þrátt fyrir að vera frekar fámennt félag eru félagskonur duglegar að taka að sér verkefni eða standa fyrir viðburðum margskonar, m.a sumarkaffi, jólabasar, barnaballi o.fl. 

Á haustfundi félagsins var samþykkt að styðja með fjárframlögum nokkra aðila í nærsamfélaginu m.a. Húsmæðraskólann á Laugum, Menningarsjóð Þingeyskra kvenna, Styrktarsjóð Heilbrigðisstofnunar Norðurlands Húsavík, Gjafasjóð Hvamms, Velferðarsjóð Þingeyinga auk einstaklinga.   

Stjórn Kvenfélags Öldunnar á Tjörnesi mætti á dögunum á fund Björgunarsveitarinnar Garðars og afhenti Birgi Mikaelssyni formanni félagsins kr. 50.000- sem minningargjöf til minningar um Freyju Eysteinsdóttur.

Í tilkynningu segir að Freyja hafi ekki aðeins starfað ötullega með Björgunarsveitinni Garðari heldur ávallt stutt dyggilega við starf Kvenfélagsins Öldunnar og vilja þær því minnast hennar með þessum hætti. 

Næsta verkefni félagsins er árlegur jólabasar og kaffisala Öldunnar sem verður haldinn í Sólvangi, sunnudaginn 19. nóvember nk. kl. 15:00