Kayla Grimsley ráðin þjálfari kvennaliðs Völsungs

Kayla þekkir ágætlega til á Íslandi en hún lék með Þór/KA við góðan orðstír árin 2012-2015. Síðustu tvö árin hefur hún verið að færa sig meira út í þjálfun í heimalandinu, Bandaríkjunum, og verður þetta fyrsta meistaraflokks verkefni hennar sem aðalþjálfari.

Það er ljóst að þetta er mikill fengur fyrir Völsung enda Kayla verið einn allra besti leikmaður Pepsi deildarinnar þau ár sem hún spilaði þar.

Illa gekk að manna meistaraflokk kvenna hjá Völsungi á síðasta ári enda ákveðin kynslóðaskipti í gangi og eldri og reyndari leikmenn horfnir á braut. Árangur liðsins var eftir því. Efnilegar stelpur eru á leiðinni upp og því virðist um tímabundið ástand að ræða. Ákveðið var að blása til sóknar eins og þessi metnaðarfulla ráðning sýnir.

Kristina Corona einnig ráðin

Þá hefur Kristina Corona einnig verið ráðin til félagsins en hún mun aðstoða við þjálfun meistaraflokksins og yngri flokka félagsins. Kristina er reyndur knattspyrnuþjálfari frá Bandaríkjunum og hefur öðlast næst hæstu þjálfaragráðuna sem í boði er þarlendis. Hún hefur mikla reynslu úr bandaríska háskólaboltanum sem þjálfari og hefur unnið til verðlauna og fengið viðurkenningar fyrir góðan árangur í starfi.

Forráðamenn Völsungs eru spenntir fyrir samstarfinu við þær stöllur og vænta mikils af þeim á samningstímanum sem er út tímabilið 2017. (volsungur.is)

Kristina Corona.