Kaldasti dagur ársins í gær - Fór niður í -29 gráður í Svartárkoti

Það var kalt við Goðafoss í gær.

Það var sérlega kalt norðaustan-lands í gær þar sem mest fréttist af -29,0 stigum í Svartárkoti í Bárðardal.

Fram kemur á veðurbloggi Trausta Jónssonar veðurfræðings að föstudagurinn 29. desember sé kaldasti dagur ársins til þessa á landinu í heild. 

Frostið í Svartárkoti í gær er það mesta sem vitað er um á landinu 29. desember og er því svokallað landsdægurlágmark.

Meiri fróðleikur er að finna á veðurblogginu en hér koma nokkrar myndir sem teknar voru í gær. Með því að smella á þær er hægt að fletta þeim og skoða í stærri upplausn.

Það var fimbulkuldi við Goðafoss í gær en á Vísindavefnum segir að orðið fimbulkuldi sé sett saman úr fyrri liðnum fimbul- og kuldi. Fimbul- er svonefndur herðandi forliður og merkir ‘ógnar-, regin-’. Fimbulkuldi er þess vegna ógnarkuldi.

Í Aðaldal.

Kuldalegt við Skjálfanda.

Húsavíkurhöfn.

Á Húsavík. Mynd Gaukur Hjartarson.

Þeistareykir. Mynd Hreinn Hjartarson.