Hvalasafnið kallar eftir hugmyndum um nýtingu á lausu rými þess

Hvalasafnið fyrir miðri mynd.

Í vikunni auglýsti Hvalasafnið á Húsavík eftir hugmyndum frá áhugasömum aðila eða aðilum um nýtingu á 400 fm. lausu rými á jarðhæð safnsins að Hafnarstétt 1 ásamt nýtingu á byggingarrétti sem fylgir húsinu.

Að sögn Valdimars Halldórssonar framkvæmdastjóra safnsins er um að ræða rými í eigu Hvalasafnsins sem hýsti um langt árabil frystiklefa, frystihólf og tengda starfsemi en þeirri starfsemi var hætt árið 2016 þegar Norðlenska fór úr húsinu. Byggingarrétturinn sem áður er getið um, er til norðurs (520 fm) upp í Naustagilið. 

Valdimar segir að ýmsir möguleikar séu í stöðunni. Af hálfu Hvalasafn-sins kemur til greina að selja rýmið í heild eða hlutum ef spennandi vel útfærðar hugmyndir koma fram sem passa við alla þá starfsemi sem nú er í gangi fyrir neðan bakkann. Útleiga til langs tíma í heilu lagi eða hlutum kemur líka til greina.

Einnig er Hvalasafnið reiðubúið í samstarf við áhugasama um nýtingu á rýmunum sem og nýtingu á byggingarétti.

Húsnæðið er á góðum stað miðsvæðis á hafnarsvæðinu á Húsavík þar sem umferð ferðafólks er mikil og vaxandi. Húsnæðið gæti t.a.m. nýst í ferðaþjónustutengda starfsemi eða í annars konar atvinnustarfsemi.