Hugleiðingar sveitarstjóra í byrjun árs

Þær miklu framkvæmdir sem nú er unnið að hér í Þingeyjarsýslum ganga vel og eru á áætlun hvað flesta þætti varðar. Mikilvægum vörðum var náð á árinu eins og stefnt var að, þrátt fyrir ýmsar hindranir sem hin margumtöluðu ljón á veginum höfðu haganlega komið fyrir. Það var t.a.m. um margt einkennileg upplifun að taka þátt í glæsilegri athöfn á Þeistareykjum hinn 23. september sl., hvar hornsteinn var lagður að glæsilegri virkjun Landsvirkjunar, á sama tíma og með öllu var óljóst með hvaða hætti þessi tugmilljarða virkjun yrði tengd raforkukerfi okkar landsmanna. Því betur kom í ljós að vinda mátti ofan af „línulagningarmálinu“ svokallaða og tjónið sem stöðvun framkvæmda við línurnar olli má vonandi vinna upp og lágmarka á árinu sem nú er nýgengið í garð. Aðrir þættir uppbyggingarinnar á svæðinu, s.s. gangagerðin gegnum Húsavíkurhöfða miðaði afar vel og hefur í reynd gengið að flestra mati framar vonum. Haftið var rofið við norðurenda ganganna 24. ágúst sl. Öll uppbygging á lóð PCC á Bakka er jafnframt innan tímaáætlana og stefnt er að upphafi framleiðslu í kísilverinu um næstu áramót. 

Ferðaþjónustan í sveitarfélaginu hefur aldrei staðið styrkari fótum. Aldrei hafa fleiri heimsótt Húsavík í þeim tilgangi að fara í hvalaskoðun, aldrei hefur úrval veitingastaða verið meira en í sumar sem leið og miklar fjárfestingar í greininni undanfarin ár farnar að skila tekjum til eigenda sinna og samfélagsins. Enn frekari uppbygging innviða og fjölgun afþreygingartengdrar ferðamennsku munum við vonandi sjá á komandi misserum. Það verður líka fróðlegt og spennandi að sjá hvort ekki takist að nýta fleiri tækifæri til uppbyggingar í greininni á austursvæðinu, þ.e. við Öxarfjörð, á Melrakkasléttu og Raufarhöfn. Sannarlega hefur uppbygging ferðaþjónustu verið hægari þar en sú í návíginu við hvalaskoðunina á Húsavík. Vonandi verða verkefni á borð við Eim, Öxarfjörð í sókn og Raufarhöfn til framtíðar, til þess að dugmikið fólk og fjárfestar elti uppi tækifæri til atvinnuuppbyggingar á svæðinu t.a.m. í tengslum við sjálfbæra, skynsamlega nýtingu þeirra fjöllbreyttu náttúruauðlinda sem við eigum í héraðinu. Mögulega er í þessum lista að finna mjóan vísi að stórsókn á svæðinu: http://www.640.is/…/oxarfjordur-i-sokn-fimm-verkefni-fengu-…

Húsnæðismálin hafa verið í brennidepli á árinu og skýrsla unnin á vormánuðum sem lýstu ágætlega stöðunni, áskorunum og tækifærum til uppbyggingar á svæðinu: http://www.nordurthing.is/…/skyrsla-um-husnaedismal-a-husav…

Vandinn hefur í hnotskurn verið nokkuð augljós engu að síður. Það vantar íbúðarhúsnæði í sveitarfélaginu, einkum og sér í lagi á Húsavík. Byggingarkostnaður er hár, síst lægri en á höfuðborgarsvæðinu, en fasteignaverð tugum prósenta lægra sé litið til undanfarinna ára. Ein stór áskorun og byggðaleg afleiðing hraðra breytinga í ferðaþjónustunni og aukinnar komu ferðafólks er samkeppni um íbúðir á stöðum eins og Húsavík í annarsvegar rekstur og útleigu til handa ferðafólki og hinsvegar íbúðir inn á almennan leigumarkað. Umhverfið eins og það hefur þróast tekur nú hærra hlutfall íbúða í tímabundin not til ferðafólks, lítið eða ekkert er byggt í staðinn, sem orsakar vöntun á húsnæði fyrir þá sem vilja flytja í sveitarfélagið. Þetta er vandi sem einskorðast ekki bara við Norðurþing heldur er þessi glíma þekkt víða utan höfuðborgarsvæðisins. Húsnæðisverð á Húsavík hefur þó farið ört hækkandi undanfarna mánuði, sem er eðlileg afleiða aukinnar eftirspurnar og vonandi verður þróunin þannig að aukin tækifæri myndast til nauðsynlegrar uppbyggingar íbúðahúsnæðis. Það er auðvitað ekki sjálfbær staða til lengri tíma að húsnæðisverð í sveitarfélagi sé margfalt lægra en annarsstaðar og langt undir byggingarkostnaði. Umhverfi húsnæðismála í landinu tók svo líka breytingum á árinu með nýrri löggjöf um almennar íbúðir sem hafa það að markmiði að bæta húsnæðisöryggi fjölskyldna og einstaklinga, sem eru undir ákveðnum tekju- og eignaviðmiðum. Ýmsir snertifletir hafa verið kannaðir á því hvað varðar aðkomu sveitarfélagins að uppbyggingu íbúða innan þessa nýja lagaumhverfis, án þess að það hafi orðið til uppbyggingaráform séu á teikniborðinu á næstunni. PCC Seaview Residences hafa og verið í viðræðum við sveitarfélagið um uppbyggingu Holtahverfis á Húsavík. Miklar væntingar eru um að af þeim áformum geti orðið og að framkvæmdir megi hefjast á fyrstu mánuðum ársins. Úthlutun lóða bæði til uppbyggingar atvinnu- og íbúðahúsnæðis var meiri á árinu en um langa hríð og það er óskandi að á öllum lóðunum rísi arðbærar fjárfestingar. 

Það má með sanni segja að við séum stödd í miðri á hvað þetta uppbyggingarskeið í Þingeyjarsýslum varðar. Árið 2017 verður mikið framkvæmdaár í sveitarfélaginu og mörgum boltum haldið á lofti. Víða verður erfiðleikum háð að koma öllu heim og saman, eins og gengur. En, það er gott að vera bjartsýnn að eðlisfari eins og bent var á í upphafi þessa pistils. Það er í reynd mjög auðvelt að vera bjartsýnn þegar áhöfnin á bátnum er skipuð góðu fólki. Hjá og í sveitarfélaginu vinnur dugmikið fólk og það er grunnurinn að því að geta áfram byggt upp skemmtilegt, heilbrigt og fjölbreytt samfélag. Í hönd fara nú mestu breytingar sem orðið hafa á samfélaginu í Norðurþingi frá upphafi. Þessar breytingar verða til þess að fjölbreyttari hópur fólks byggir svæðið, fjölbreyttari atvinnutækifæri skapast, fjölbreyttari afþreying verður í boði og fjölbreyttara samfélag mótast, vonandi til lengri tíma. Þessum breytingum eigum við að taka fagnandi þótt óvissan um framtíðina geti stundum virkað ógnvænleg og erfið. En, ágætu íbúar, við höfum allt sem þarf til að efla samfélagið okkar með nauðsynlegri aðstoð nýrra íbúa sem vonandi upplifa sig fljótt og vel hluta af því góða samfélagi sem við öll viljum áfram byggja. Sami maður og vitnað var til í upphafi pistilsins sagði að bjartsýnismaður sæji tækifæri í erfiðleikum en svartsýnismaður erfiðleika í öllum tækifærum. Í hvoru liðinu viljum við vera? Í miðri á veit ég í það minnsta hvorum hópnum ég ætla að tilheyra. Gleðilegt nýtt ár!