30. des
Hjálmar Bogi maður ársinsFólk - - Lestrar 269
Hjálmar Bogi Hafliðason.
Friðgeir Bergsteinsson stóð fyrir vali á Húsvíkingi/Þingeyingi ársins líkt og í fyrra og var valið kunngjört í dag.
Fyrir valinu varð Hjálmar Bogi Hafliðason.
Friðgeir ritar svo á Fésbókarsíðunni Húsavík fyrr og nú:
Hjálmar hlaut að þessu sinni yfirburða kosningu og er hann vel að titlinum kominn.
En eins og ykkur er öllum kunnugt gaf Hjálmar, Guðnýju Þóru Guðmundsdóttur nýra í byrjun desember, gekk sú aðgerð eins og í sögu og er bataferli þeirra beggja nú í góðum farvegi, um aðgerðina og þeirra sögu var fjallað nýlega á mbl.is og fer sú fallega jólasaga hér á eftir.
Þó að stærsta gjöf Hjálmars í ár hafi auðvitað verið nýrnagjöf til Guðnýjar þá hefur hann síður en svo legið með hendur í skauti síðustu misserin, því hann lætur jú til sín taka víða í samfélaginu heima á Húsavík eða í Þingeyjarsýslu. Hans aðalstarf er deildarstjóri í Borgarhólsskóla á Húsavík, hafa verkefnin í stjórnendateyminu þar verið ærin á covid tímum og hefur skólastarf þar gengið það vel að eftir hefur verið tekið.
Ásamt því að sitja einnig í Sveitarstjórn Norðurþings fyrir Framsóknarflokkinn þá starfar Hjálmar einnig víða í sjálfboðaliðastarfi, td er hann varaformaður Kirkjukórs Húsavíkur, hann er virkur í starfi Björgunarsveitarinnar Garðars ásamt því að vera fyrrverandi formaður í Golfklúbbi Húsavíkur, einnig er hann virkur í Leikfélagi Húsavíkur.
Er það samdóma álit að Hjálmar kunni ekki að segja nei, ef til hans er leitað eftir einhverri hjálp eða liðsinni, fyrir samfélagið sitt.
Hjálmar Bogi er því einkar vel að titlinum kominn og óskum við honum til hamingju með kosninguna og velfarnaðar í sínum störfum fyrir samfélagið á Húsavík og í Þingeyjarsýslu.
Hann fær þar að launum Smakkseðil frá Durk and Rose og Gaia fyrir 2. Hjálmar er nú þegar búin að heyra frá mér.
Til hamingju Hjálmar Bogi. Takk allir kærlega fyrir að senda mér ykkar tillögur og til hamingju allir hinir sem fengu atkvæði.
640.is á Facebook