20. júl
Hefur spilað 300 leiki fyrir Völsung og einum beturÍþróttir - - Lestrar 219
Bjarki með Sóley dóttur sinni eftir leik nr. 301.
Sá merki atburður átti sér stað í leik Völsungs og ÍR í 2.deild karla sl. laugardag að Bjarki Baldvinsson spilaði sinn 300 leik fyrir meistaraflokk Völsungs í deild og bikar.
Eru þá ótaldir tugir æfingaleikja og Lengjubikarsleikja. Þetta er auðvitað ótrúlegur árangur og gerir Bjarka enn frekar þann langleikjahæsta í sögu Völsungs.
Bjarki kom inn á í sínum fyrsta leik í meistaraflokki 3.sept 2006 gegn Aftureldingu, þá á 16.aldursári.
Helgina eftir spilaði hann svo sinn fyrsta byrjunarliðsleik, 9.sept 2006, á Húsavík gegn KS/Leiftri.
Bjarki er þó hvergi nærri hættur og getur enn á sig blómum bætt. Í dag er hann spilandi aðstoðarþjálfari liðsins og miðlar miklu til leikmanna liðsins. Það er mikill fengur í Bjarka og varla til meiri félagsmaður og Völsungur.
Á fésbókarsíðu Græna hersins er Bjarka óskað hjartanlega til hamingju með áfangann og þakkað kærlega fyrir frábært framlag sitt í gegnum árin.
Bjarki bætti svo um betur í gærkveldi þegar hann kom inn á í leik gegn Haukum og hefur þar með á fjórða hundrað leikja í handraðanum.
Liðsmynd sem tekin var fyrir fyrsta byrjunarliðsleik Bjarka þann 9. september árið 2006.
Bjarki og Sóley Ósk dóttir hans að loknum leik númer 301 sem fram fór í gærkveldi.
Með því að smella á myndirnar er hægt að fletta þeim og skoða í hærri upplausn.
640.is á Facebook