Fyrstu stig Völsunga í Mizunodeildinni - Villi og Védís heiðruð

Villi og Védís voru heiðruð af blakdeild Völsungs.

Um helgina var mikið um að vera hjá blakfólki Völsungs en þá fór fram árlegt Nýársmót öldunga á föstudag og laugardag.

Á sunnudeginum mætti síðan meistaraflokkslið kvenna Þrótti frá Reykjavík í hörkuleik í Mizunodeildinni. 

Metþátttaka var á Nýársmótinu þar sem um 50 lið af norður- og austurlandi tóku þátt. Að venju var leikgleðin það sem mestu skiptir á öldungamótum en öllu gamni fylgir þó alvara og keppnin um efstu sætin í hverri deild hörð og ekkert gefið eftir.

Karlalið Völsunga stóðu sig óvenju vel að þessi sinni og enduðu í 2 sæti í fyrstu deild og fyrsta sæti í annarri deild.

Greinilegt að stífar austantjaldsæfingar hinnar serbnesku Sladjönu sem þjálfar karlana eru að skila sér.

Völsungskonur stóðu að venju fyrir sínu, fjögur lið tóku þátt og endaði A liðið í 3. sæti í fyrstu deild og B liðið í 1. sæti í annarri deild. 

Völsungur er 90 ára í ár og af því tilefni heiðraði blakdeildin Vilhjálm Pálsson og Védísi Bjarnadóttur fyrir brautryðjendastarf í blaki á Húsavík og áratuga starf við kennslu og þjálfun.  

Þar var blakið alla tíð í hávegum haft og óhætt að segja að þau hafi lagt grunninn að því góða starfi sem hefur alla tíð verið í kring um blakíþróttina á Húsavík. 

Það voru Andri Már Sigursveinsson og Arney Traustadóttir sem afhentu Villa og Védísi blóm og Völsungstreyjur í viðurkenningarskyni fyrir sín störf og stuðning gegn um tíðina. 

Lið Völsungs í Mizunodeildinni ásamt þjálfara sínum Lorenzo Ciancio.

Stelpurnar enduðu frábæra blakhelgi með sigri á Þrótti R 3-1 og náðu þar með í sín fyrstu stig í deildinni. Liðið spilaði feikna vel og var sigurinn öruggur.

Liðið er mjög jafnt og spilar frábæran varnarleik en þar er Dagbjört Erla Gunnarsdóttir fremst meðal jafningja og er að skipa sér í flokk bestu varnarspilara deildarinnar. Í sókninni voru þær Sladjana Smiljanic, sem skoraði flest stig Völsunga eða 14, og Þórunn Harðardóttir sterkar og skiluðu mörgum flottum skellum sem Þróttarar réðu illa við.

Liðið hefur tekið miklum framförum frá því í haust og verður spennandi að  fylgjast með næstu leikjum.

Hér koma nokkrar myndir úr leiknum og með því að smella á þær er hægt að fletta þeim og skoða í stærri upplausn.

Hér má lesa frétt Blakfrétta.is af leiknum