FSH og Versló báru sigur úr býtum í bréfamaraþoni Íslandsdeildar Amnesty

Nemendu FSH með viðurkenninguna.

Árlega heldur Íslandsdeild Amnesty International Bréfamaraþon þar sem samtökin hvetja einstaklinga til að taka höndum saman og styðja við bakið á þolendum mannréttindabrota með pennann að vopni. 

Á heimasíðu Íslandsdeildarinnar segir að fyrir rúmu ári hafi deildin sett á laggirnar vefsíðuna „Bréf til bjargar lífi“ þar sem einstaklingar og menntastofnanir voru hvattar til að leggja hönd á plóg.

Sem fyrr efndi Íslandsdeild Amnesty International einnig til samkeppni meðal framhaldsskóla landsins um mestan fjölda undirskrifta á Bréfamaraþoni samtakanna. Í þeirri keppni var keppt í tveimur flokkum, annars vegar í söfnun flestra undirskrifta og hins vegar flestra undirskrifta miðað við nemendafjölda. Nemendur úr 36 framhaldsskólum svöruðu kallinu og söfnuðu 23.026 undirskriftum með ákalli um úrbætur í þeim ellefu málum sem samtökin tóku upp að þessu sinni. Aldrei hafa fleiri framhaldsskólar tekið þátt.

Nemendur við Verzlunarskóla Íslands söfnuðu flestum undirskriftum í keppninni en þeir söfnuðu samtals 6.250 undirskriftum. 

Framhaldsskólinn á Húsavík náði besta árangri miðað við nemendafjölda og söfnuðust 636 undirskriftir sem gera 6,84 undirskriftir á hvern nemenda.

Við hátíðlega athöfn sem fram fór í Verzlunarskólanum afhenti Magnús Guðmundsson aðgerðastjóri Íslandsdeildar Amnesty International skólanum viðurkenningu og gjöf frá deildinni. Þar var afhentur farandbikar sem Steingrímur Eyfjörð myndlistarmaður hannaði en gripurinn hefur lengi prýtt verðlaunaskáp Verzlunarskóla Íslands því skólinn er núna að vinna keppnina í þriðja sinn á fjórum árum. Nemendur Verzlunarskólans höfðu það að orði að bikarinn væri kominn aftur heim en Kvennaskólinn í Reykjavík vann keppnina í fyrra. Guðrún Gígja Sigurðardóttir og Adda Smáradóttir stýrðu aðgerðum innan skólans og náðu þær frábærum árangri því skólinn þrefaldaði fjölda undirskrifta frá því árið áður.  

Nnemendur Framhaldsskólans á Húsavík tóku við viðurkenningu fyrir árangur sinn núna í upphafi árs en skólinn vann þennan flokk keppninnar annað árið í röð. Þar fóru þau: Margrét Nína Sigurjónsdóttir, Iðunn Bjarnadóttir, Birta Guðlaug Sigmarsdóttir, Særún Nanna Brynjarsdóttir og Huginn Ágústsson fyrir nemendahópnum.

Þessir öflugu mannréttindasinnar drifu samnemendur sína áfram og lögðust allir á eitt að bæta met skólans frá því í fyrra. Það tókst og Húsvíkingar eiga mikið hrós skilið.

Rétt á hæla skólans var Framhaldsskólinn í Austur-Skaftafellssýslu en skólanum hefði dugað að fá undirskriftir frá einungis fjórum íbúum Hornafjarðar í viðbót til að vinna keppnina. Það er því ljóst að landsbyggðin átti sterka erindreka í ár.

Nemendur í framhaldsskólum og félagsmiðstöðvum landsins skrifuðu tæplega helming allra þeirra bréfa sem send voru frá Íslandi til stuðnings þolendum mannréttindabrota. Ungt fólk á Íslandi er augljóslega með sterkt mannréttindahjarta. (amnesty.is)