Fréttir úr starfi Völsungs

Knattspyrnusumri lokið

Þá er fótboltasumarið liðið með góðum árangri.  Félagið átti tvo yngri flokka í úrslitum í Íslandsmóti, 4. flokkur karla og 3. flokkur kvenna. Meistaraflokkarnir stóðu sig mjög vel, stelpurnar komust í úrslit og léku við FH og strákarnir unnu sig aftur upp í 2. deild með góðum endaspretti. Ánægjulegu og lifandi knattspyrnusumri er lokið en boltinn heldur áfram að rúlla. Nú taka við haust- og vetraræfingar á gervigrasvellinum, í sundlauginni og Höllinni. Svo vonum við að snjóalög og vindar verði okkur hagstæðir í vetur.

Íþróttavellirnir

Aðalstjórn Völsungs sér um reksturinn á íþróttavöllunum og vallarhúsinu, það er því í okkar verkahring að sjá til þess að allt sé í lagi úti á velli og að klefarnir séu þrifnir og tilbúnir fyrir æfingar og keppni. Stefna okkar er að byrja að nýta efri hæðina á vallarhúsinu og í vetur ætlum við að bjóða upp á kaffi tvo morgna í vallarhúsinu fyrir göngufólk sem nýtir sér gervigrasið. Þetta verður auglýst fljótlega og hefst um miðjan október. Það er von okkar að fólk nýti sér þetta og setjist niður og spjalli saman.

Fundir með formönnum og þjálfurum

Aðalstjórn hefur fundað með formönnum deilda og kynnt fyrir þeim handbók Völsungs um fyrirmyndarfélag. Núna er komið að því að deildirnar setji saman námskrá hver í sinni deild sem þjálfarar munu styðjast við í þjálfun sinni. Félagið stefnir að því að fá viðurkenningu frá ÍSÍ sem fyrirmyndarfélag í desember á þessu ári.

Einnig hefur félagið haldið fund með öllum þjálfurum félagsins og farið yfir siðareglur félagsins ásamt því að kynna fyrir þeim þá kafla í handbókinni er snúa að þjálfurum. Þessir fundir eiga að stuðla að góðu upplýsingaflæði milli deilda, þjálfara og aðalstjórnar sem vonandi virkar svo út í starf félagsins.

Allar virkar deildir eiga að skila fjárhagsáætlun til aðalstjórnar fyrir 15. nóvember ásamt iðkendalistum, með því tryggja þeir sinni deild rétt til úthlutunar styrkja sem aðalstjórn veitir á hverju ári samkvæmt ákveðinni reiknireglu aðalstjórnar.

Félagsgjöldin

Félagsgjöldin verða send út í október og er gjaldið 3000 kr. Félagsgjöldin munu birtast í heimabanka ásamt því að við sendum gíróseðla með upplýsingum hvaða ávinningur það er fyrir viðkomandi að greiða félagsgjaldið. Samkvæmt lögum félagsins þá ber öllum sem eru 18 ára og eldri og leggja stund á æfingar, keppni og starfa innan Völsungs að greiða gjaldið. Það er von stjórnar að félagsmenn taki höndum saman og greiði gjaldið.

Opnir tímar á laugardögum

Í október ætlum við að bjóða upp á „opna tíma“ í Höllinni frá kl. 13:30-15:00. Í þessa tímum er öllum frjálst að koma og er þetta einn liðurinn í því að bjóða hinum almenna félagsmanni upp á einhverja hreyfingu. Þetta verður tilraunaverkefni núna í október og ef vel gengur þá verður áframhald á þessum tímum. Fyrsti tíminn verður núna á laugardaginn 3. október og þá verður boðið upp á hnit. Tímarnir verða auglýstir inn á heimasíðu félagsins.

Þá verður Grænatorg opið fyrir félagsmenn til að horfa á beinar útsendingar af knattspyrnuleikjum í Evrópu.

Að lokum vona ég að vetrarstarfið verði árangursríkt og gott. Ég hvet alla þá sem koma að starfinu að leggja sitt að mörkum til að gera Völsung að að enn sterkara og öflugra íþróttafélagi.

Með Völsungskveðju

Guðrún Kristinsdóttir

Formaður. Í.F.Völsungs