Fréttir frá aðalfundi Styrktarfélags HÞ

30. maí

Fréttir frá aðalfundi Styrktarfélags HÞ
Fréttatilkynning - - Lestrar 285

Auður tekur við blómvendi frá forstjóra HSN.

Á dögunum var aðalfundur Styrktarfélags Heilbrigðis-stofnunar Þingeyinga haldinn í húsakynnum HSN á

Húsavík.

Þar var farið yfir starf félags-ins á árinu og lagður fram ársreikningur félagsins.

Fram kom í máli formanns félagsins, Auðar Gunnars-dóttur, að gjafir til stofnunarinnar sem fjármagnaðar voru af styrktarfélaginu hafi numið rúmum 7 milljónum króna. Þar ber helst að nefna að keypt var ómtæki að andvirði rúmlega 4,5 milljóna króna sem mun nýtist m.a. kvensjúkdómalækni og þvagfæraskurðlækni sem sinna sjúklingum í Þingeyjarsýslum.

Styrktarfélaginu barst veglegur arfur frá Hilmari Valdimarssyni að upphæð 2,7 milljóna auk þess sem Lionsklúbbur Húsavíkur og Kiwanisklúbbur Húsavíkur komu myndarlega að kaupunum með fjárframlagi upp á eina milljón króna hvort félag. Auk þess voru

félagsgjöld félagsmann og ágóði af sölu minningakorta nýttir til kaupa á ýmsum búnaði fyrir starfsstöðvar HSN í Þingeyjarsýslum.

Einnig kom fram í máli formannsins að félögum hafi fækkað talsvert undanfarin en félagatalið telur nú 327 félagsmenn. Þetta skýrðist helst af færri nýskráningum í félagið undanfarin ár og að fleiri félagar hverfi af félagatalinu vegna andláta. Fram kom í ræðum fundarmanna að brýnt verkefni stjórnar verði að vinna að fjölgun félagsmanna og auðvelda fólki að styðja við það mikilvæga starf sem félagið sinnir í heilbrigðismálum í nærsamfélaginu.

Auður hefur verið formaður félagsins í 8 ár en lætur nú af því embætti. Við því tekur Daníel Borgþórsson en auk hans bætist Dagbjört Bjarnadóttir við sem stjórnarmeðlimur í stað Elínar Baldvinsdóttur sem einnig lætur nú af stjórnarstörfum í félaginu eftir hartnær 20 ár.

Var þeim Auði og Elínu þakkað fyrir störf sín í þágu félagsins og tóku við blómvöndum frá stjórn félagsins. Að sama tilefni afhenti forstjóri HSN, Jón Helgi Björnsson, þeim stöllum veglegan blómvönd sem þakklætisvott frá stofnuninni fyrir vel unnin störf í hennar þágu. Um leið minnist Jón á mikilvægi slíks styrktarfélags fyrir stofnunina þar sem fjárframlögum ríkisins til tækjakaupa væri mjög þröngur stakkur sniðinn. Því væri ómetanlegt að geta leitað til Styrktarfélagsins þegar endurnýja þyrfti lækningatæki. Það væri einnig mikilvægt að geta búið starfsfólki góða starfsaðstöðu til að laða að vel menntað og hæft starfsfólk til starfa hjá stofnuninni.

Ásgeir tekur við gjafabréfi úr hendi Hildar Sigurgeirsdóttur.

Á fundinum fór fram formleg afhending á nýjum speglunarbekk ásamt vökvadælu, hjólastól, tveimur háum göngugrindum. Það var Ásgeir Böðvarsson, meltingarlæknir sem tók við gjöfinni fyrir hönd stofnunarinnar en búnaður þessi verður nýttur á starfstöðinni á Húsavík. Það eru heiðurshjónin Aðalbjörg Gunnlaugsdóttir og Stefán Óskarsson frá Rein sem gefa þennan búnað til minningar um

Kristjönu Ríkeyju Magnúsdóttur, bróðurdóttur Aðalbjargar, sem lést úr krabbameini árið 2019.

Auður og Aðalbjörg með þakkarbréf frá Styrktarfélaginu.

Stjórn Styrktarfélagsins vill koma á framfæri innilegum þökkum til allra þeirra sem létu fé af hendi rakna til félagsins á árinu. Auk ofan talinna gjafa og tækjakaupa voru keypt ýmis tæki og búnaður fyrir starfsstöðvar HSN í Þingeyjarsýslum fyrir gjafafé þessara velunnara félagsins.

Íbúar á starfssvæði HSN í Þingeyjarsýslum eru svo hvattir til að gerast félagsmenn í Styrktarfélaginu með því að fylla út eyðublað á vef HSN. Eyðublaðið er á vefslóðinni https://www.hsn.is/husavik/hsn-husavik/styrktarfelag-hsn-husavik/umsokn-um-felagsadild og þar er einnig að finna upplýsingar um bankareikning félagsins þar sem hægt er að leggja inn frjáls fjárframlög.

Höldum áfram að hlúa að innviðum heilbrigðisþjónustu í Þingeyjarsýslum.