Framsýn tekur heilshugar undir áhyggjur skólanefndar FSH

Framsýn stéttarfélag hefur sent frá sér ályktun þar sem m.a. er tekið heilshugar undir áhyggjur skólanefndar FSH varðandi fjárhag skólans sem og stöðu skólameistara.

Ályktunin er eftirfarandi:

„Framsýn stéttarfélag tekur heils hugar undir áhyggjur Skólanefndar Framhaldsskólans á Húsavík sem lýsir yfir þungum áhyggjum af fjárhagslegri stöðu skólans og kallar eftir tafarlausum aðgerðum stjórnvalda til að tryggja rekstrargrundvöll skólans til framtíðar.

Þrátt fyrir að stjórnendur hafi sýnt ábyrgð á rekstri skólans hefur það ekki dugað til þar sem skólanum hefur ekki verið gert kleift að standa undir daglegum rekstri. Rekja má það til þess að framlög ríkisins hafa ekki verið í takt við skuldbindingar skólans ekki síst vegna launahækkana kennara. Að sjálfsögðu er það á ábyrgð stjórnvalda að tryggja skólanum rekstrarfé til starfseminnar á hverjum tíma og gildandi laga um framhaldsskólamenntun á Íslandi.

Þá krefst Framsýn þess að Menntamálaráðuneytið auglýsi nú þegar eftir skólameistara við Framhaldsskólann  á Húsavík og eyði þannig þeirri óvissu sem myndast hefur um framtíð skólans sem gegnir gríðalega mikilvægu hlutverki í samfélaginu. Núverandi skólameistari var skipaður tímabundið fram að næstu áramótum.

Framsýn óskar jafnframt eftir skoðunum þingmanna kjördæmisins á þessari alvarlegu stöðu sem í aðdraganda kosninga töluðu fyrir mikilvægi menntunar í heimabyggð, þingmenn sem í dag eru hljóðir um stöðu mála.“