Framsýn - Ályktun um Húsavíkurflugvöll

„Um leið og stéttarfélagið Framsýn fagnar gríðarlegri aukningu á fjölda farþega um Húsavíkurflugvöll milli ára skorar félagið á flugmálayfirvöld og Isavia að hraða viðgerðum á vellinum til að auka öryggi flugumferðar um völlinn. Fyrir liggur að ljósabúnaður er ófullkominn og þá er aðkallandi að ráðist verði í lagfæringar á slitlagi flugbrautar.

Húsavíkurflugvöllur er ekki einungis notaður fyrir farþegaflug heldur gegnir hann mikilvægu öryggishlutverki varðandi sjúkraflug. Nú þegar miklar framkvæmdir eru að hefjast á Húsavíkursvæðinu sem tengjast uppbyggingu á orkufrekum iðnaði á Bakka er afar mikilvægt að öryggi Húsavíkurflugvallar verði tryggt sem best.“