Framsýn ályktar um Matvælafrumvarpið.

Matvælavinnsla er öflug grein í Þingeyjarsýslum.

Framsýn stéttarfélag, fagnar ákvörðun Alþingis um að fresta afgreiðslu á umdeildu Matvælafrumvarpi sem var til umræðu á vorþinginu. Ljóst er að miklir hagsmunir eru í húfi er snerta matvælaöryggi þjóðarinnar, búfjársjúkdóma og atvinnuöryggi fjölda fólks sem starfar við úrvinnslu landbúnaðarafurða.

Framsýn hefur sérstakar áhyggjur af starfsöryggi félagsmanna og þeirra sem starfa í afurðarstöðvum og við þjónustu er tengist landbúnaði. Á landsvísu eru þetta um 3000 störf.

Það er krafa félagsins að Alþingi gefi sér þann tíma sem þarf til að meta áhrif frumvarpsins á íslenskt atvinnulíf og þar með hinar dreifðu byggðir landsins sem byggja afkomu sína að mestu leyti á landbúnaði. Því verður ekki trúað að markmið stjórnvalda sé að leggja landsbyggðina endanlega í rúst. Stjórnmálamönnum ber að hlusta á raddir fólksins í landinu.

 Húsavík 20. júní 2008