Frábær árangur hjá Völsungum í krakkablaki

Íslandsmeistarar Völsungs á verðlaunapalli.

Um liðna helgi fór blakdeild Völsungs með fríðan hóp af krökkum til Akureyrar á Íslandsmót í blaki í 4. og 5. flokki.

Mótið var í umsjón KA og var til fyrirmyndar, gist var í Lundarskóla og keppt í KA heimilinu, lagt var af stað frá Húsavík á föstudagskvöldi þar sem fyrsta lið átti leik snemma á laugardagsmorgni.

Á heimasíðu Völsungs segir að mikil eftirvænting hafi verið í hópnum, jafnt hjá leikmönnum sem og þjálfurum og gaman hefði verið að sjá hvernig nýi þjálfarinn Sladjana Smiljanic small inn í þetta starf.

Skemmst er frá því að segja að þessir krakkar allir sem einn stóðu sig frábærlega og stemmingin, liðsheildin og allt andrúmsloft var algjörlega frábært, 5. flokkur A vann til gullverðlauna með fullt hús stiga og B lið 5. flokks spilaði um bronsið þar sem naumt tap var niðurstaðan og því 4. sætið okkar. 4.flokkur stóð sig mjög vel en tapaði því miður tveimur leikjum í oddahrinum og endaði í fjórða sæti hársbreidd frá verðlaunasæti.

Eftir því var tekið hversu öflug liðin frá Völsungi eru orðin og hversu vel hefur tekist að halda þessum krökkum saman. Fékk Völsungur mikið hrós frá þjálfarateymi unglingalansdliðsins sem var á staðnum en samhliða þessu móti voru landsliðsæfingar hjá U16 og áttu Völsungar tvo fulltrúa þar, Arneyju Kjartansdóttur og Heiðrúnu Magnúsdóttur.

Niðurstaðan eftir þessu frábæru helgi er sú að greinilegt er að blakið á Húsavík er á réttri leið og um að gera að hvetja börn og ungling að vera með í skemmtilegum og fjölbreyttum hóp, bæði stráka og stelpur.

Íslandsmeistarar á verðlaunapalli. Ljósmynd volsungur.is

Hópmynd af keppendum Völsungs.

Ljósmynd volsungur.is

Fleiri myndir er hægt að skoða á heimasíðu Völsungs