Frá Rauða krossinum í Þingeyjarsýsslum

Aðalfundur Rauða krossins í Þingeyjarsýslum var haldinn í Hafliðabúð á Þórshöfn á dögunum og var vel mætt til fundar.

Á fundinum var kosin ný og öflug stjórn þar sem formaður er Sigrún Björg Aðalgeirsdóttir.

Með henni í aðalstjórn eru Inga Sigurðardóttir, Þórarinn Þórisson, Hanna Berglind Jónsdóttir og Jónas Þór Viðarsson. Varastjórn skipa Halldóra Gunnarsdóttir og Brynjar Þór Vigfússon.

Rauði krossinn í Þingeyjarsýslum hefur sinnt ýmsum verkefnum síðastliðið ár enda hafa margar áskoranir bankað upp á. Eftir erfiðan harðindavetur þar sem deildin opnaði fjöldahjálparstöð og sinnti símhringingum til að athuga með aðstæður skall Covid 19 á. Deildin var með starfsmann í aðgerðastöð á Akureyri, kom að sóttvarnarhúsi, sinnti símhringingum ásamt því að fara með matarsendingar til fólks.

Þess fyrir utan hélt deildin opnum eins og hægt var tveimur búðum, einni á Þórshöfn og annarri á Húsavík. Einnig uppfærði deildin búnað í fjöldahjálparstöðvum, sinnti fatagámum, heimsóknarvinum, styrkti verkefni í Sómalíu og viðbragðshópur sinnti ýmsum verkefnum. Stefnt er á áframhaldandi vinnu í ofangreindum verkefnum ásamt því að fara í verkefni sem snúa að innflytjendum.

Þessum verkefnum eru gerð betur skil í meðfylgjandi fréttabréfi. Við hvetjum alla til að skoða heimasíðu Rauða krossins og fylgja Þingeyjarsýsludeild á facebook https://www.facebook.com/rkthing. 

Áhugasamir geta skráð sig sem félaga og sjálfboðaliða – þeir eru drifkrafturinn í öllum okkar verkefnum og því fleiri sem taka þátt, því mun meira er hægt að gera í þágu samfélagsins.

Stjórn Rauða krossins í Þingeyjarsýslu