Flóttinn yfir Miðjarðarhaf – ný íslensk heimildarmynd

Myndin fjallar um gríðarlegan straum flóttamanna frá Afríku sem freista þess að komast yfir Miðjarðarhafið til Evrópu í leit að betra lífi. Talið er að um fimmtán prósent þeirra sem halda á hafið, komist ekki alla leið!  Hvað rekur fólk til að taka þessa áhættu, hvílík þrekraun er það að velkjast um á opnu hafi í lekum báti og hvað tekur við? Bíður betra líf handan við hafið?

Sjónvarpsmennirnir Gísli Einarsson og Karl Sigtryggsson sigldu með varðskipinu Tý um Miðjarðarhafið í tólf daga í lok mars og byrjun apríl, m.a. yfir páskahátíðina. Týr hefur verið á Miðjarðarhafi frá því í nóvemberlok, sem hluti af Tríton verkefni Frontex, stofnunar um landamæragæslu á vegum ESB.  Hlutverk áhafnar Týs er að bjarga flóttamönnum í sjávarháska. Á meðan sjónvarpsmennirnir dvöldu um borð bjargaði áhöfn Týs 320 flóttamönnum af lekum trébáti. Þeir náðu einstöku myndefni af aðgerðinni og ræddu við flóttamenn eftir að þeir voru komnir um borð í Tý. Þá fengu þeir að fara í stutta heimsókn í flóttamannabúðir á Sikiley.

Í myndinni er rætt við flóttamenn sem björguðust um borð í Tý um páskana og aðra flóttamenn. Rætt er við skipverja á Tý, fréttaskýranda, fulltrúa hjálparsamtaka og annarra sem koma að málefnum flóttafólks.

Myndin er í tveimur hlutum. Fyrri hlutinn ber undirtitilinn  „Með lífið að veði“ og sá síðari „Neyðarkall – bátur í háska“