Fjallgöngukonan Edurne Pasaban hlaut Landkönnunarverðlaun Leifs Eiríkssonar

24. sep

Fjallgöngukonan Edurne Pasaban hlaut Landkönnunarverðlaun Leifs Eiríkssonar
Almennt - - Lestrar 274

Edurne Pasaban og Vilborg Arna.

Spænska fjallgöngukonan Edurne Pasaban hlaut í gær Landkönnunarverðlaun Leifs Eiríkssonar við hátíðlega athöfn í Sjóminjasafninu á Húsavík.

Þetta var þriðja sinn sem verðlaunin eru veitt.

Pasaban er fædd í Tolosa á Spáni árið 1973 og vann þau afrek á árunum 2001 til 2010 að klífa öll fjöll heims yfir 8 þúsund metrum, en þau eru 14 talsins. Hún er fyrst kvenna í heiminum til að vinna þetta afrek, sam aðeins fáir landkönnuðir hafa náð. Pasaban er oft kölluð fjalladrotningin fyrir afrek sín.

Vilborg Arna Gissurardóttir afhenti Padaban verðlaunin en Babita Sharma, fréttaþula hjá BBC, kynnti þær á svið.

Hinn ítalski Alex Bellini hlaut verðlaun fyrir afrek sín sem ungur landkönnuður, en hann hefur róið einn yfir 35 þúsund kílómetra og gengið um 2 þúsund kílómetra um heimskautasvæðin. Mörg sinna stærstu afreka vann hann fyrir 30 ára aldur. Árið 2006 fór hann á handafli yfir Atlantshafið og var einn á bátnum í 227 daga.

Árni Sigurbjarnarson hjá Norðursiglingu afhenti Alex Bellini verðlaunin.

Haraldur Sigurðsson eldfjallafræðingur var einnig verðlaunaður á hátíðinni fyrir starf sitt við eldfjallafræði og við þekkingarmiðlun, en hann hefur vakið athygli víða um veröld fyrir skrif sín.

Í tengslum við verðlaunin hefur farið fram Landkönnunarhátíð á Húsavík undanfarna þrjá daga og lýkur henni í dag. Það er Könnunarsafnið á Húsavík sem stendur að verðlaununum og hátíðinni.