Draumahöll Láru Sóleyjar

Lára Sóley Jóhannsdóttir.

Húsvíkingurinn Lára Sóley Jóhannsdóttir, bæjarlistamaður Akureyrar 2015-2016, gaf nýverið út nýja plötu sem nefnist Draumahöll.

Draumahöll er vögguljóðaplata sem ætluð er ungum börnum,en hentar þó öllum aldri. Tónlistin, sem er sungin, leikin á fiðlu og píanó er angurvær og látlaus.

Flytjendur eru þau Lára Sóley Jóhannsdóttir sem syngur og leikur á fiðlu og Stefán Örn Gunnlaugsson, sem leikur á píanó, harmoníum og klukkuspil en Stefán sá einnig um upptökustjórn. 


Á plötunni er að finna 14 lög, sem fléttast saman í eina heild með spunnum stefjum sem tengja lögin saman. Um er að ræða blöndu af íslenskum og erlendum lögum, þar af eru þrjú ný lög og textar.

Titillag plötunnar, Draumahöll, er samið af Láru Sóleyju, Augnablik sem þetta er eftir Einar Örn Jónsson og Brosið þitt er lag Hjalta Jónssonar við texta Láru Sóleyjar.
Önnur lög eru Dvel ég í Draumahöll, Litfríð og ljóshærð, Leikur sér í ljósinu, Bí bí og blaka, Blátt lítið blóm eitt er, Nú sefur jörðin, Vinaljóð, Sofðu unga ástin mín, Fann ég á fjalli, Næturljóð, Vikivaki og Sofðu rótt. 


Með plötunni vill Lára Sóley hvetja foreldra og þá sem starfa með börnum til þess að halda tónlist að börnum, syngja fyrir þau og með þeim. Að því tilefni hefur Lára ákveðið að gefa eintak af plötunni á allar deildir leikskóla Akureyrarbæjar og Norðurþings.