Degi barnabókarinnar fagnað

Birgitta og Marta skrifuðu söguna Andvaka fyrir börn á aldrinum 6-16 ára í tilefni dags barnabókarinnar að beiðni IBBY á Íslandi, en þetta er í sjötta sinn sem félagið fagnar deginum með þessum hætti. Marta og Birgitta eru lesendum á grunnskólaaldri að góðu kunnar fyrir bókaflokkinn Rökkurhæðir.

„Það er mikil áskorun að skrifa sögu sem hentar svo breiðum aldurshópi og þótt sagan sé stutt var ferlið að lokatakmarkinu mjög langt. Við höfum hingað til einbeitt okkur að því að skrifa sögur sem gerast í Rökkurhæðum og þar er alltaf eitthvað dularfullt, jafnvel svolítið hræðilegt (stundum mjög hræðilegt!) á seyði. Við erum hins vegar meðvitaðar um að það hentar ekki öllum krökkum að lesa eða hlusta á þannig sögur. Þess vegna ákváðum við að hafa Andvaka ekkert mjög hræðilega en við værum ekki Birgitta og Marta nema það væri pínupínulítill hrollur í sögunni.“

Sagan verður lesin fyrir grunnskólabörn á öllum aldri og er verkefnið hluti af þeirri hugsjón félagsins að lestraráhugi og lestrarfærni fáist fyrst og fremst með því að færa ungum lesendum vandaðar og spennandi sögur. Dagur barnabókarinnar var laugardaginn 2. apríl en sagan er flutt 5. apríl svo allir grunnskólanemar landsins geti hlustað á hana saman.

Í tilkynningu frá IBBY á Íslandi segir að mjög góð þátttaka hafi verið í sögustundinni undanfarin ár og skemmtileg stemmning myndast um allt land.